Aizawl: Govt. Hrangbana College Youth Adventure Club te chuan June ni 1-4,2015 inkar chhung khan khawchhak lam tlawhchhuah (eastern expedition) an nei. HBC Adventure Club te hian Hnahlan ram chhunga vanapa thlan tlawhin an tifai a, hemi hnu hian kham hmingthang tak, Khamsen hmunah uaiin (rapelling) a san zawng an teh a. Hnahlan khawtlang hruaitute nen an inkawm bakah school naupangte kokhawmin chhiatrupna lo thlen thulha chhanchhuahna hna thawh dan leh chet lak dan an zirtir bawk. Adventure Club te hian Rihdil pawh tlawhin a hmunhma an thianfai bawk a ni. Expedition programme hi thangthar ten hmasang Mizo pipu te sulhnu leh an nuna thil pawimawh tak tak, ngaihhluta, humhalh nachang an lo hriat zel theih nan te, Mizote nuna thil pawimawh tak, tlawmngaihna vawn nun reng theih nan leh thangthar te ruihhlo laka an fihlim theih nan te, faina kawnga hmasawn nan bakah chhiatrupna lo thlen thulha tanpuina hna an thawh dan leh chet lak dan tur inzirtirnan te a buatsaih a ni.