AS Monaco-a Portugal midfielder pawimawh, Bernardo Silva a khelh lai khan French thiampuipa ni mek, Kylian Mbappe hi an nau a ni a, rawlthar mai la ni mah se khatih lai atang daih tawh khan thiam an lo tih tawh a, ‘he nau hi tu nge?’ tiin an lo inzawt tawh thin.

Portugal leh France hi Uefa Euro 2024 khelh mekah Zirtawpni zan hian semifinal luh inchuhin Volksparkstadion, Hamburg-ah an inhmachhawn dawn.

“Kylian hi player tha bik a ni a, kum 16 mi lek a nih lai khan Monaco-ah kan awmho tawh a. Kan kianga chawlhkar khat a awm hnuah kha chuan a khelh dan avangin ‘he nau hi tu nge?’ tiin kan inzawt sap sap hlawm tawh a ni,” tiin Manchester City midfielder chuan a sawi.

“Tha taka thanga tun a thleng hi lawmawm ka ti a, a kal zelna turah pawh duhsakna ka hlan a; mahse, keini lakah ni lovin, keini chuan tlang kan duh a ni,” tiin Zirtawpni zanlai (Inrinni zing)-a an inkhelh tur chungchang a sawi.

Silva hi City-a kum 2017-a a luh hma season thum chhung French club-ah hian a khel thin a. A luh tirh lai hian Mbappe hi an academy-ah awmin a hnu deuhva senior team-ah a inlan phak ve tan a, hetih hun lai pawh hian thiam an lo ti hlawm hle tawh a lo ni.

Mbappe hian a naupan laia a entawn leh a ngaihsan, a hnung a zui ve mek, Portuguess captain Cristiano Ronaldo a hmachhawn thei ve dawn thung a, a tan chuan chawimawina a nih hial thu a sawi ve.

Kum 25 mi, France captain chuan a naupan laia a pindan banga a thlalak a tar thin, Ronaldo chungchang sawiin, “Tun hma leh a hnu lamah pawh eng pawh thleng sela, ani hi chu ‘legend’ a ni reng ang,” a ti a. An inkhelh turah erawh hnehna chana semi-final luh ngei a inring thung.