ZALEN March 30, 2026: ZPM chuan vawiin khan an Party Office-ah chhung inkhawm hun an hmang a, thusawitu ZPM Leader & Chief Minister Lalduhoma chuan Opposition an nih laia an lo vahvaihpui leh innghahna tam tak chu an kutah tih theih turin a lo thleng a, Pathian thuin, 'Ka thlarau zawkin le' a tih angin he sawrkar-ah hian Pathian Thlarau hnathawh a thleng mek a ti.

Lalduhoma chuan, "Assam Rifle sawnchhuah chungchangah te leh Territorial Army din tur chungchangah pawh Zerubabela hunlai ang mai khan thlarau hnathawh a lo thleng mai a ni,” a ti. ZPM Leader hian tlawmngai pawl (MZP, MTF etc.)-a nihna pawimawh tak tak chelh leh party hrang hrang atangin ZPM zawm thar mi 15 a lawmlut a ni.

Lalduhoma chuan, “Tun kum kal mek, nikum April atanga vawiin thlenga sawrkarin GPF kan pekchhuah tawh zat chu Cheng nuai 25,892 a tling tawh a. Kan sawrkar hma pawha kan sawi ngam he thil vawiina kan ti thei hi kan lawm takzet a ni. Sawrkar hmasa khan sawrkar hnathawk pension 974 chiah a tihfel sak a, kan sawrkar hnuah pension singhnih sangli chuang kan tihfel sak thei,” a ti.

Sawrkar hmasa leibat chungchang sawiin “Kum 2022-23 Budget session kan neihah Pu C. Lalsawivunga’n leiba chungchanga zawhna a siam chu, Chief Minister leh Finance Minister ni bawk Pu Zoramthanga chuan, “India ramah leiba tam ber pakhatna kan ni” tiin a chhang a. Kan GSDP atang chhutin a zahve aia tam leiba kan nei. ZPM sawrkar hnuah sum enkawl thiamna avangin sawrkar laipui chuan Rs. 35,000 lakh min pe a. 16th Finance Commission-in kum 5 lo awm tura sum kan dawn dan tur min ruahman sakah India ram puma a chang tam ber 5-na kan ni,” a ti.

Duhoma chuan, “Delhi malsawmna Pathianin min pe a, keini hnam te tak te hi India ram lal ber Prime Minister hriat kan ni. Tuna kan leibat zat hi SASCI avangtein a lang tam lo thei lova, a lan tam hi kan duh zawk. Sawrkar hmasaah khan RLB Grant, VC te chan tur kum 2021-22 chhunga 1st Installment Nuai 3,450 lakh an haichhuak a, a bak an haichhuak tawh lo. Kan sawrkar hnuah Khawtin hmasawnna tur kan ngaih pawimawh avangin kum 2021-22 2nd instalment atanga tun financial year thlenga hman tur nuai 36,200 lakh kan haichhuak a, heng zawng zawng hi kan VC te kutah a lut vek dawn. MNF hunlaia VC te dawn tur kha ZMP sawrkar hnuaiah VC ten a double-in an dawng dawn a ni,” a ti. 

AMC hnuaia ULB Grant chungchang sawiin, “Kum 2024-25 khan Nuai 2,976 lakh kan nawrchhuak a. Hei hi AMC-ten an ngawih bopui veng veng a, March 18 khan kan hrechhuak chauh a, MNF AMC-te khan Aizawl an lo vei lo hle a ni. A lapse loh nan Nuai 2,876.88 kan haichhuak leh hman a, Nikum hmasaa mi kan haichhuak a, tuna mite kutah a lut a, tunah kan hmang thei dawn ta chauh a ni. Kum 2025-26 Grant nawrchhuah leh a ngai a, Nuai 3053.20 lapse tur a awm. Tun ni hnih lek la awm chhung hian nawrchhuah kan tum leh mek a ni. Ngaihsak loh avanga hetianga a liam ringawt tur hi a pawi kan ti a, kan ui a, theihtawp kan chhuah a ni,” a ti.

Lalduhoma chuan, “Solid Waste Management Centre (SWMC), Tuiriala paihna tur siam nan AMC-in JCB 3 nei sa renga mimal JCB hawhin Crore 1.26 an seng a, thil mak tak a ni. SIPMIU-in a thlawnin AMC hnenah tripper 50 leh pik up 4 a thlawnin an pe a. October, 2022-a an neih kha a kum lehah hralh an duh ta mai a. Cheng nuai 24 chuanga an neih kha cheng nuai 5 awrhin an hralh leh. Thil dik lo hi kan do tur a ni a. AMC Sports Complex, Bawngkawn chungchangah mi 16 hnena hna inpek chungchang thlengin thil dik tawk lo tam tak a awm mek niin a lang. Mizoram khawpui berah kalphung hlui kaihhruai sawrkar AMC a la ding hi kalphung tharah chuan sawrkar lai thawhpui thei tur AMC kan thlan ngei a ngai tawh a, AMC tha zawk tih hi kan auhla tur a ni a ti,” a ti bawk.