Kar tluanin khawvel chuan Breast Feeding Week a hmang a, Mizoram-ah pawh hman a ni bawk a ni. Nu hnute tui chauh thla 6 ruk thleng nau pek inzirtirnaah kan state chu a hmahruaitu kan la ni thei a, a lawmawm hle a, nghawng tha tak a neih ngei a rinawm a ni. Mithiamte sawi dan chuan nu hnute tuiah nau mamawh a awm kim tih a ni a; he thu hi a mawngphah ni mahse, health care lungphum innghahna chu a ni si a. Mihring taksa hi inang lo mahse, naupan lai atanga enkawlna mumal tak peka naupang enkawl seilen a nih chuan puitlin hnuah taksa chu a chhe harin mi hrisel tha pangngai-ah a in chhuah theih a, a nih dan tur tak a ni ti ila sual tam vakin a rin-awm loh. Hnam leh ram changkang kan tih te hian mihring inekawlna mawngphah ‘basic health care’ an uluka chumi avang chuan natna an tawk tlem a; ramin natna enkawl nan sum tam zawk a hman a ngaih loh na na na chuan a lo thlawna sum luang liam pawh a tlem thin a ni. Mizote’n changkan kan pan duhna lamah hian nun hrisel hi kan thlauh thla mah mahin a lang a tih ngam tawhin a rinawm a, a tlangpui in, zu, ruihhlo leh taksa tichhe thei dangte kan thun nasaa hemi in a nghawng chhuah ngawt pawh hi sum tam tak luan ral tirtu chu a ni phawt mai. Naupang nih laia Sawrkar-in inenkawlna a pek tha taka lak hi nu leh pa mawh nih hre lemlo kan awm tam hle a, natna tawh changin Sawrkar-ah bawk kan vawm leh si a; hei hian a lo thlawna sum luan ralna a thlen a ni tih hriat a hun tawh viau a ni. Pakhat dang lehah chuan Sawrkar health care leh facilities tha taka dawng, hrisel pangngaia thanglian, thahnemngai taka hna thawk, lifestyle buai map khawpa hna la nasa hi Mizo thalai zingah an tam khawpin a hriat. Khawthlang leh khaw-chhak ramin hna an thawh nasat leh an muttlem thu te kan ziaka, kan sawi bawk a, a nghawng chhiat zia chhut pha lem lovin chumi lamah chuan nasa takin kan tlan mek niin a lang a. Sum erawh an hmu teh meuh, mahse inenkawl nan tam tak a luangral leh si thin te hi inenlet a hun tawh zia tilangtu a ni thei mai em? Heng lamah hian inzirtirna pek kan ngai tak meuh niin a lang a, Sawrkar mawha dah mai lovin Khawtlang leh Kohhran lamah tan lak a ngai a. Heng aia pawimawh ber chu ‘in chhung’ atanga inzirtirna in pek hi sawi rin a tul mek niin a lang thei a, beidawng lovin nawrlet zel hi chhung tin mawhah la ngam leh turin incho phur thar leh ila a fuh a rinawm. Sawrkar pawhin policy lian leh tha tak tak a kalpuia, a fakawm a, district hosiptala thawktute pawh indaih lo hle mahse tha thlah hauh lova vawiin thleng an la tang fan fan thei hi fak tur an ni mawlh ang. Chutih rualin khawltha leh man to pui pui hun rup rup kan tih rual hian ‘basic healthcare/primary health care’ lam hi thlah thlam chi a ni loa, mihring taka inbuk tawka siamtu a nih avangin nasa taka kalpui reng a pawimawh a, mipui lam pawhin ngaih pawimawh nachang hriat tum ila ram tana tha kan thawh ve theihna a ni tih hriat nawn a tha bawk ang. Thingkungin par nalh tak a chhuah theihna chu a ‘zung’ a ni a; hemi hre reng hian ‘health care’ pawh a zung hrut nawn a pawimawh fo ang.