Aizawl December 3, 2023 : Kum kal mek 2023-2024 policy hnuaiah Mizoram State Health Care Scheme (MSHCS) a inziaklut chhungkaw 26,569 an awm a, nikum aiin inziaklut an tlahniam.

Kum kal mek 2023-24 chhung a health care a inziaklut chhungkua te hi AAY (Card eng) ah chhungkaw 3,721, PHH (Card pawl) ah 12,229, Non NFSA (Card var) 10,422 leh ration card neilo 179, avaiin, 26,569 a ni.

Policy year October ni 1, 2021- March 31, 2022 ah health care a inziaklutte registration fee atangin Rs. 3,31,67,050 hmuh a ni a. April ni 1, 2022 - March 2023 ah Rs. 4,96,73,240 hmuh a ni.

Kum liam ta 2022-23 khan MSHCS hnuaiah chhungkua 39,505 inziak lut an awm. Inziak lut tlem chhan hi zirchianna neih a ni hran lo va, a chhan tak hriat a ni lo.

MSHCS tihchangtlun nan Mizoram sawrkarin Asian Development Bank (ADB) loan puk tur a buaipui mek a, hemi atan hian tihchangtlun dan tur duan mek a ni a, chak taka hmalakna kal mek a ni.

Tar lan tawh thin angin Mizoram sawrkar chuan MSHCS atan ADB atangin Rs. Vbc. 1,000 puk a tum a, tih fel theih a nih chuan bill tang tam lutuk a ziaawm theih beisei a ni.

Health Care a inziaklut awm tawh dan :

October 1, 2019-September 30, 2020 (thla 12) ah inziaklut chhungkaw 61,015 an awm.

October 1, 2020-September 30, 2021 (thla 12) ah chhungkaw 1,13,720.

October 1, 2021-March 31, 2022 (thla 6) ah chhungkaw 87,695 inziaklut an awm.

2022-23 chhungkua 39,505 an inziak lut.