March 13, 2023; April ni 1, 2023 atangin 2023-2024 policy hman tan a ni leh dawn a; ration card mila in ziahluh tur niin, ration card nei lo le raltlan te tan pawh a in ziahluh theih dawn.

Sawrkar hnathawk leh sawrkar hnathawkin a chenpui sawrkara a bill sak theihte inziahluh phal a ni lo a. Sawrkara MR bill theilo zawng zawngte chuan health care hamthatna an hmang tangkai thei ang.

MSHCS hnuaia inziaklutte hian damdawiina an inenkawlna senso chhungkaw khatin kum khat atan Rs. 2,00,000/- thleng an bill thei dawn a ni.

MSHCS ah (policy year) October 1, 2019-September ni 30, 2020 (thla 12 ah inziak lut chhungkaw 61,015 an awm a, October ni 1, 2020-September ni 30, 2021 (thla 12) ah chhungkaw 1,13,720, October ni 1, 2021-March ni 31, 2022 (thla 6) ah chhungkaw 87,695 an awm a, kum kal mek 2022-23 atanga inziak lut zat chu chhungkaw 39,505 ah tlahniamin, kum hmasa aia a tlemna zaa 45.04 a tling.

Hetihlai hian Mizoram sawrkar chuan changtlung zawk a health care kalpuina turin Asian Development Bank (ADB) atangin Rs. Vbc. 1008 a puk dawn a, nikum June thla khan loan pukna tur chu ministry of finance in a pawmpui tawh.

ADB loan puk tur chungchang hi MNF party chuan sawifiahna thuchhuah an lo siam tawh a, chuta an tarlan dan chuan, loan puk tur Rs. Vbc. 803.76 chu External Aided Project (EAP) hnuaia kal tur a ni a, EAP guidlines angin central sawrkarin 90% Rs. Vbc. 723.38 atangin a rul dawn a, loan puktu Mizoram sawrkarin 10% - Rs. Vbc. 80.38 atangin a rul thung ang.  

• Inziahluhna man bithliah zat
  (Ration Card milin)
  1. AAY (Card eng) nei tan : Rs. 200/-
  2. PHH (Card pawl/hring) : Rs. 1,000/-
  3. Non-NFSA (Card var) : Rs. 2,000/-
  4. Ration Card nei lo leh raltlan : Rs. 2,000/-