ZALEN October 20, 2025: MNF Senior Vice President Dr. R. Lalthangliana, Dampa bial bye-election a MNF official candidate chuan Dampa West leh Dampa South Block khaw hrang hrangte a fan chhuah hnuin Phuldungsei PHC a tlawh a. Phuldungsei PHC-ah hian IV Grade hnathawk pawh an awm lo a, thawktute an indaih lo hle a, khawtlang mipui an buai hle bawk a ni. Marpara leh West Phaileng PHC-te pawh tlawhin thawktu indaih loh avanga an manganna leh thawktute harsatna tawh ngaihven turin sawrkar a phut.

Health Minister hlui Dr. Thangtea chuan Phuldungsei PHC building hi a hun laia cheng nuai 277 senga ṭha taka sak zawh a nih thu a sawi a. Dampa bial hi Mamit District huam chhunga awm a nih angin, thlan tlin a nih chuan bial chhung khaw hrang hranga PHC leh Sub-Centre te pawh Aspirational District a nihna hmang ṭangkaiin, hriselna lamah hmasawnna a awm theih nan leh Staff indaih lohna avanga bial mipuiin harsatna an tawh ṭhin sukiang tura theihtawp chhuah a tum thu a sawi.

Mizoram Sawrkar pawh hian health sector lam phei hi chu mihring thih leh dam inkar a nih avangin ngaihsak bik se a duh thu a sawi a. MZP West Phaileng Branch pawhin tukin khan Dr. Thangtea hi an lo hmu bawk a ni.

"Phuldungsei, Marpara leh West Phaileng PHC te manganna leh harsatna te hi ZPM Sawrkar hian a rang thei ang bera an ngaihsak ka phut a ni," Dr. R. Lalthangliana chuan a ti bawk.