ZALEN March 17, 2026: Health Minister Lalrinpuii chuan Mizoram State Aids Control Society (MSACS) ten theih tawpin HIV /AIDS donna kawngah an theihtawpin hma an la tih a sawi a, he hunah hian Kohhran hruaitute chu nasa lehzuala hmalak pui turin a ngen.

Vawiin khan Lalrinpuii hian MSACS te office tur State Resource Centre for HIV/AIDS Building thar chu MINECO-ah a hawng , he huna building hlanna hun hmangtu, Church Council of Mizoram General Secretary Rev Dr. Lalhmangaiha hnenah Kohhran hruaitute nasa lehzuala hmalak pui turin a ngen a, an committee Agenda-ah AIDS vei an tlakhniam thei na tur lam hawi te telh turin a ngen bawk.

Minister chuan, "Kum 30 chhung awareness kalpui a ni tawh naah hma chi hrang hrang a lak a ni tawh mah se, HIV kai an tam zel a, kan la hniam thei bawk si lo chu a manganthlak," a ti a. Kohhran hruaitute chu Mizoram ah chuan ngaihsan ber an nih angin kohhran hrang hrang hotute chu hma lak pui turin a sawm a, AIDS vei a tlakhniam theih nan Innei tur reng rengah HIV AIDS test certificate thlenga phut thin a duh thu a sawi.

K. Lalrinzuali, IAS, Commissioner & Secretary, H&FW Dept. chuan hawnna Programme hi kaihruaiin, Mizoram State AIDS Control Society in chak zawka hma an lak theih nan anmahni pual bik Building "State Resource Centre for HIV/AIDS" hmun, Mizoram New Capital Complex (MINECO) ram chhunga mi hi 445.23 Sq. Metre a zau niin MINECO Management Committee-in July 29, 2020-a an pek a ni a. A building hi Ministry of Development of North Easter Region (MDONER) fund atangin Rs. 4,00,00,000/- (Cheng Vaibelchhe 4) a sak a ni.

Building hawnna programme-ah hian MSACS Project Director Dr. Jane R. Ralte chuan H&FW Minister Lalrinpuii hnenah “Women Icon Award" a dawn avanga lawmpuina thilpek a pe a, Minister hian MSACS Project Director lo ni tawh thin te hnenah chawimawina thilpek a hlan bawk.