ZALEN October 31, 2023 : MPCC chuan, "Kum 5 MNF sawrkar chhunga kan chian em em chu kan nunna leh kan ram hi MNF rorel tlak lo, pawisak nei lo leh hlemhletna laka fihlim lo kutah hian kan dah ngam tawh lo tih hi a ni. He election lo awm tur hi min rawktu leh kan healthcare system tikhawlotute laka kan lungawilohna tihlanna ni mawlh rawh se," an ti.

Vawiina chanchinthar thehdarhtute an hmachhawn naah Congress chuan, Mi tam tak nunna chhan tur leh nun nuam zawk an neih theih nan healthcare system tih hmasawn a, dinhmun chhe taka dah tu rorel tlak lo, pawisak nei lo leh hlemhletna laka fihlim lo MNF mangtha a hun an ti bawk.

Congress chuan, "INC chuan health insurance hi chhungkaw tin tan nuai 15 thleng kan tiam a. Rajasthan-a Congress sawrkarin heihi a hlawhtlinpui mek a, Mizoramah pawh hlawhtlinpui ve ngei kan tum a ni. Cancer leh natna khirh dangte enkawlna turin cheng vaibelchhe 5 fund dah kan intiam bawk," an ti.

Congress a sawrkar chuan district hospital tinah diagnostic centre changtlung tak dah vek a, a changtlung thei ang bera damdawi in te pawh thuam that vek an tum thu an sawi bawk. "Khawvel huap natna hlauhawm tak tak leng reng karah hian kan sawrkar lai hi chuan inenkawlna lam tih hmasawn ahnekin dinhmun hlauhawmah mipui min dah zawk a, kan mamawh inenkawlna tur pawh min pe thei lo a ni," an ti.