Aizawl; Nikum 2013-2014 thleng khan Mizoram chhunga ram hectare 17588 ah Oilpalm chin a ni tawh a, kumin ah hian ram hectare 5700 ah chin leh tum a ni a, hriattheih chinah ram hectare 3000 ah chinbelh leh a ni tawh. Agriculture Department hotute hnen atanga thudawn danin Oilpalm hi Mizoram chhunga district 7, (Champhai tiam lovin) a khaw 225 ah chin mek a ni a, loneitu chhungkaw 10800 in an ching mek a ni. Company nen inremna an ziah sa tawh angin Kolasib leh Mamit district chhunga tharchhuahte chu Godrej Agrovet Company in an lei dawn a. Company hian Bukvannei-ah khawl bunin loneitute tharchhuah hi an lei reng a, tharchhuah a tam tawk hrihloh avangin an duh khawp lei tur an la hmu lo. Aizawl, Serchhip leh Saiha district a tharchhuah te hi 3F Oil Palm Agrotech Pvt. Ltd. in an lei dawn a, an ni pawh hian Mat phai ah khawl bun tumin hma an la mek a. Lunglei leh Lawngtlai district a leitu tura ruat Ruchi Soya Industries Ltd. pawhin Rotlang ah khawl bunna tur an enfiah mek nia thudawn a ni. Sawrkar laipui chuan Company te khawl bunna tur hian tanpuina Rs. vaibelchhe 7.50 chu Mizoram sawrkar a pe tawh a, khawl pakhat bunna senso ah hian vaibelchhe 2.5 zel pek theih a ni a. He sum hi Godrej Agrovet Company hnenah pek a ni tawh a,3F Oil Palm Agrotech Pvt. Ltd. leh Ruchi Soya Industries Ltd. te pawhin khawl an bun hunah sum hi pek an ni veleh ang.Sawrkar leh Company ten inremna an siam angin Oilpalm te hi kg ah Rs.5.50 zelin company hian an lei a, a man hi loneitute account ah an lei atanga kar khat chhungin an dah thin a ni. Zalen palaiin a kawm naah Agriculture thawktute chuan tunhnaia mi thenkhatin Oilpalm chin in ram a tichhia nia an sawi chu sawifiahin ram thenkhat Malayasia, Indonesia ah te chuan ramngaw thiatin Oilpalm an ching a, hei hian ramngaw a tichhia a. Mizoram ah erawh chuan loneituten ramngaw thiat lovin anmahni huan leh hmun awl laiah te an chin avangin ramdangte ang chuan Mizoram chuan a tawrh ve an ringlo tih an sawi.

Oilpalm chi hi Company in ramdang Costa Rica leh Thailand atanga a chi tha la chhuakin Nursery ah an kui tiak a, ft.3 vela sang a nihin sawrkarin kung khat Rs. 85 zela leiin loneitute hnenah a thlawnin a pechhuak veleh thin a ni. Oilpalm quintal 1 ah hian a hriak litres 20-25 vel chhuak thei a ngaih a ni a, hei bakah hian a mu atangin kernel oil siamin chocolate leh cosmetics siamnan an hmang leh thin. Oilpalm hi tel atan an hmang a, Mizoram a herchhuah te hi Kolkata ah an hralh leh thin.