Aizawl: General Administration Department (Aviation Wing) chuan helicopter service na atangin Rs 7,25,59,532 an hmu tawh a, helicopter pakhat service belh tir turin hma an la mek. Zalen zawhna chhangin Aviation hotute chuan helicopter pakhat a service mek tih sawiin hemi service tirh atanga kumin March, 2018 thleng khan Rs 7,25,59,532 lakluh a ni tawh a. Tunah hian khaw 13-ah a service mek a ni. Aviation hotute chuan helicopter pakhat dang service-tir tura hma lak mek a nih thu an sawi a. Mualpui-ah State sawrkar Helipad siam mek niin, khaw pawimawh thenkhatah helipad siam hna kalpui mek a nih thu an sawi bawk. Helicopter service chu sorkarin mipuite hamthatna liau liau atan a siam tih sawiin nunna hlu tak chhan nante tangkai taka hman a nih thu an sawi a. Sum hloh pawh huamin sawrkarin a kalpui mek tih sawiin kum 2017-ah damlo 80 leh kum 2018 March thla thleng damlo 46 phurh a ni bawk.