Aizawl; March 1, 2023 atangin Mizoramah satel helmet khum phal a ni tawh dawn lo a, helmet chungchangah khauh lehzuala dan lekkawh tur niin a hremna pawh a na dawn.

Hemi chungchangah hian Aizawl Traffic SP Rodingliana Chawngthu chuan nikum December 14 khan hriattirna a lo tichhuak tawh a, chumi hnuah a khât tawkin two wheeler khalhtuten harsatna an tawh loh nan leh an himna a ni tih hriaa inhmakhua lawk tura ngenna Aizawl traffic police-ten an tichhuak thin.

ZALEN thudawn  danin helmet (protective headgear)-ah hian ISI mark a chuang ngei ngei tur tihna lam a ni lo va, Section 129 of the Motor Vehicle Act, 1988-in a sawi angin, a siam dan phung leh accident tawh palh pawha him ngei tur (Bureau of Indian Standard mil leh kalphung anga siam) khum tur a ni a. Chumi zawm lote hremna/chawi tur chu Rs. 1,000 zel a ni dawn.

Helmet chungchangah khauh zawka dan lekkawh a nih dawn avang leh mipuite inbuatsaihna hun a awm that avangin helmet zawrhna dawrte pawh a lun chho zel a, online site hrang hranga chah mi tam tak an awm tura ngaih a ni bawk.

Traffic SP-in December 14, 2022-a hriattirna a lo tihchhuah tawha tar lan a nih danin Supreme Court Committee on Road Safety thupek, Ministry of Road Transport & Highways atanga hmuh leh Motor Vehicles Act, 1988 Section 129-in a sawi angin two wheeler khalhtuten helmet him leh rintlak an khum a ngaih thu a tar lang a, “A siam dan leh nihphungah BIS-in a pawm chin leh a tlukpui helmet tha leh him chin chauh khum tur a ni. Mizorama kan hman lar satel helmet kan tihte hi BIS pha lo a nih avangin khum phal a ni lo,” a ti.