Aizawl; Sorkar kum chhiara kum 5 chhungin mi 112739-te thisen test tawh-ah Hepatitis B mi 1265 hmuh chhuah niin,Hepatitis C mi 1364 hmuh chhuah a ni a. Kumin sorkar kum kal mek June thla thleng khan thisen 7092 endik tawhah Hepatitis B 87 leh Hepatitis C mi 69 hmuh chhuah a ni tawh bawk. Helath & Family Welfare hnen atanga thudawn danin Sorkar laipui atangin programme bik awm a nih loh avangin thisen test tawh zat atanga Hepatitis hmuh chhuah khaikhawm bik a awm lo a, tuna Hepatitis hmuh chhuah tawhte hi Mizoram chhunga Blood bank 10 atanga thisen endik atanga hmuh chhuah niin, heng thisen hmuh chhuah dinhmun hi MSACS hnenah theh khawm thin a ni. Hepatitis natna buaipui tur bik sorkar laipui atanga programme duan bik a awm loh lai hian thudawn danin Health lama mithiamte chuan hmarchhak bial chu hepatitis B leh C natna hluarna hmun a ni tih an sawi thung a. Thudawn danin hmarchhak bial mihring awm zawng zawng atangin 1.9% velin hepatitis C natna an vei anga chhut a ni. World Health Organization report chuan khawvela mihring 12 zela pakhatin hepatitis B emaw hepatitis C natna an vei tiin a tarlang bawk a ni.