Darkar khata km 35.80 zeta chaka tlan thei, a tlan chak theih em avanga a hming lemah pawh ‘Mizo Flash’ tia an sawi thin, Lallianzuala Chhangte chu Pathianni zana khelh zawh tak, 2023 Hero Intecontinental Cup final-ah khel tha ber atan thlan a ni a, India a champion-pui.

Indian Super League-a Mumbai City tana khel, Lianzuala hian final-a Hero of the Match chawimawina a dawn hi a phu tak zet a, Odisha khawpui, Bubhaneswar-a Kalinga Stadium-a inkhelah hian Sunil Chhetri goal thun tur a siamsak bakah amahin goal thunin si hnih faiin Lebanon an hneh.

Lianzuala hian tun tournament-ah hian vawi li khelin team tana tangkai tak a ni vek a. Goal hnih a thun a, Chhetri nen goal thun tam ber an ni.

Inkhelh zawha lawmman an hlannaah Mizo tlangval chuan a thiante hnenah lawm thu a sawiin a thawh chhuah goal thunte chu an tan a hlan a, “Zalen taka ka khelh theih nana hnung lama min vengtu ka khelhpuite chungah ka lawm a, goal leh ka siamsak kha an tan ka hlan a ni,” tiin a sawi.

Final-ah hian India hian Lianzuala hovin tha taka bul tanin a chungnung zawk an ni tluan a, chawlhlawk hma phei chuan ball 57% an chang phak a, goal erawh an thun thei lo.

Second half tan leh chiahah Mizo tlangval a inlar ta a, Chhetri goal thun tur a siamsak a. A la duhtawk mai lo va, minute 15 hnuah India hmahruaina sawhnghetin goal a thun leh ta bawk.

India hian kum 1977 hnuah a vawi khat nan Lebanon a hneh veleh ta a, inkhel vawi ruk zet goal an chhuah lo zawn ta bawk a, kum 1952 hnua an chhuah loh rei ber a ni.

2023 Hero Intercontinaltal Cup-ah hian Asian Football Confederation atangin a thlengtu, India bakah Lebanon leh Mongolia telin Oceania Football Confederation (OFC) atangin Vanuatu an tel bawk a. An inkhelh kual hnuah a sang pahnihin final an khel a ni.

Tun tum tournament-ah hian coach Igor Stimac chuan player 27 a ko va, Lianzuala bakah hian Mizo player dang, Lalengmawia Ralte pawh a tel a. A tira mi 41 a koh zingah Jerry Mawihmingthanga a tel tawh bawk.