ZALEN Nov 7, 2025 : Zokhawthar PS Case No. 53/2025 Dated 10.07.2025 u/s 21(c)/29 ND&PS Act r/w 14A(b) Foreigner Act-a a meizang hlaptu ber Lalchhuanthangi (50) d/o Hmingthanzauva (L), Khatla South, Aizawl chu Zokhawthar PS team te chuan Special Bureau leh Delhi Police te ṭanpuinain Delhi-ah Dt. 4.11.2025 khan an man.

He case hi Dt. 10.7.2025-a brick type Heroin No-4 fir, Kg. 7.422, Kudamsen Kai, Zokhawthar a manna leh a tira mi panga lai man an nih tawhna case kal zel a ni. Lalchhuanthangi hi India leh Myanmar inkara ruihhlo tawlh ruknaa a meizang hlaptu ni ngeia hriat a ni a. Amah hi Thailand-ah pawh ruihhlo thubuai vanga kum riat lai (2014-2022) lungin tang tawh nia hriat niin, kum 2023-a Kerala state-a pawisa thila inbumna (money scam case) thubuai nei lai, man a nih lai pawh hian he pawisa thubuai ah hian bail-a a chhuah lai nia hriat a ni. Dwarka Court in phalna a pek angin amah hi Mizoram rawn panpui mek a ni.

Mizoram Police-in ṭum khata Heroin a man tam berna, Saitual PS Case No. 63/2025, dt 23.08.2025, u/s 21(c)/29/25 of the ND&PS Act r/w Sec 14 of the Foreigners Act thubuaia meizang hlaptu Joseph Lianthangpuia (42) s/o Lianchhuma (L), Chanakya Place, New Delhi chu Delhi-ah vek hian Dt. 5.11.2025-ah khan man a ni bawk.

He case-ah hian lirthei pakhat B/R No. MZ-01X-1909, Lalliancheua (20) s/o Challianzula, Falam, Myanmar khalh aṭangin Heroin Kg 15 man a ni. Joseph Lianthangpuia pawh hi Champhai Police team ten Mizoram an rawn panpui mek a ni.

Thubuaia inhnamhnawihte manna kawngah hian Delhi Police leh Special Bureau te an pawimawh hle a, an thawhpuina zarah misualte man niin, court-a phalna lak leh thlawhnaa inphurh thlengin an zarah tluang takin thil kalpui a ni a, Mizoram Police chuan an chungah lawmthu a sawi tak meuh meuh a ni.

#ZalenNews