November 15, 2023; Dan phal loh Heroin tawlh ru-a puh Lalbeiseia (78) leh Lalnuntluanga (40) te chu nimin khan Champhai District Special Court ND&PS Act Liansangzuala'n thiam loh a chantir a, kum 10 chhung Lung in tang tur leh Rs. Nuai 1 chawi ve ve turin a hrem.

Lalbeiseia leh Lalnuntluanga te hi pafa niin Champhai Vengsang a khawsa an ni a, July ni 13, 2022 tlai dar 3 khan Dawrkaikawnah Champhai Police-in an Car atangin Heroin hawng 22 an mansak a, Champhai District Jail-ah dahluh an nih hnuah bail a chhuah lailawk tir an ni a, bail-a an chhuah chhung hian Lalnuntluanga zawk hi damdawi kaihhnawihah man nawn leh a ni a, Special Court ND&PS Liansangzuala chuan an chungthu a ngaihtuah a, thuhretu hrang hrangte thu a ngaihthlak hnuah Lalbeiseia leh Lalnuntluanga te hi thiam loh chantir an ni ta a ni.

Defence Ukil-te chuan kum upa tawh leh natna benvawn nei an nih avangin a hremna a nep thei ang ber turin an ngen sak a, Police Procecutor Lalchhuansanga Sailo chuan Lalnuntluanga chu man a nih tawh hnuah pawh dan a bawhchhiat leh avangin dan ang taka hremna pe turin Court a ngen thung.

Special Court ND&PS Act chuan heng mi pahnihte hi kum upa tawh leh natna benvawn nei an nih avangin a nep thei ang bera hremna hi pein kum 10 chhung lung in tang tur leh Rs. Nuaih 1 ve ve chawi turin a hrem a, pawisa chawi tur hi an nei lo a nih chuan thla 6 dang an tan belh leh dawn a ni.