Aizawl; Nimin khan Gauhati High Court, Aizawl Bench chuan MNF MLA candidate thenkhatin Electronic Voting Machine (EVM) chungchanga petition an thehluh a thutlukna a puang a, MNF te thu thehluh chu innghahna tur a awmlo a ni tiin EVM pawh check chian a ngai lo a ni, a ti. High Court in judgement a puan dan chuan 'Election petition thehluh reng reng chuan thu belhchian leh rintlak a kengtel tur a ni a, thu thehluh reng reng pawh rinthu emaw thil ni thei tur a innghat ni lovin a chiang fak tur a ni' a ti a. Court chuan, 'MNF candidate te hian case an file naah hian EVM hi khawih chingpen ngei a ni tihchianna turin Court ah hmanrua (material set) engmah thehluh tur an nei lo a ni' a ti bawk a. MNF ten EVM enchian an phut chungchangah pawh Court chuan, 'EVM hi check chian a ngai lo a. He petition hi section 82 of Representation of People Act kalh anih avangin tihtawp (dismiss) a ni' a ti bawk. Kum 2013 MLA inthlanpui a EVM te chu a dik tawklo a ni tiin MNF MLA candidate 23 te chuan High Court ah petition an thehlut a, tun tumah hian Court hian candidate 11 te thuremna a tichhuak a, midang 12 te hi Judge dangin an chungchang a rel veleh dawn a ni. Thudawn danin mi 12 te chungchang ngaihtuahtu tur Judge hi September 15 atang hian thu tanin case hi a ngaihtuah dawn a, dan tlangpui ah chuan Judge hmasa te thuremna kalh zawngin thutlukna an siam ngai lo a ni. EVM chung-changah hian MNF lam chuan ukil ah C.Lalramzauva an hmang a, Congress MLA te hian ukil ah C.Lalsawirema an hmang thung. High Court thuremna chungchangah hian thuchhuah siamin MNF party chuan Gauhati High Court (Aizawl bench) hian MNF/MPC MLA candidate te hi thiam loh a chantir tihna lam ni lovin writ petition/PIL emaw-a kalpui zawk turin thurawn a pe a ni mai a ni an ti a. Mipui court-ah tunge thiam chang tiin hmalak zel an tum tih an sawi bawk. L.Thangmawia vrs H.Rohluna Dr. R.Lalthangliana vrs Chalrosanga Joseph Lalzawmliana vrs Zodintluanga Vanupa Zathang vrs H.Zothangliana RK Lianzuala vrs R.Vanlalvena Saikapthianga vrs Lalrinmawia Ralte HB Lianmunga vrs John Rotluangliana C.Lalramzauva vrs Lal Thanhawla RM Chakma vrs Dr. BD Chakma Dr. K.Pachhunga vrs S.Laldingliana C.Ramhluna vrs C.Ngunlianchunga