ZALEN November 24, 2024 : Mizoram sawrkarin an term ral hmaa Village Council-te inthlang tura a tih vangin VC-te an lungawi lo hle a, a tul chuan dan hre mite rawnin high court thleng an kal mai thei.

ZALEN Mizoram Village Council Association President K.Lalngaizuala a biaknaah naktip Thawhlehni (26.11.2024)-a All Mizoram Village Council Association inkhawmpui, Dawrpui Multipurpose Centre-a neih turah VC thiah chungchang hi an thu ngaihtuah tur zingah a tel tih a sawi a, “Hmun hrang hranga village council-te hian term ral hmaa inthlantir tum kan nih avangin an thinrim hle a, ka chai nasa khawpin ka ring a ni,” a ti.

Mangaia chuan a hun hmaa village council thiah chu thil kalphung a ni lo tih sawiin, “A hun hmaa village council inthlantir hi tu sawrkar mahin a tih kan la hre lo a. Democracy ram kan nih angin kan inthlang thin a, hetia a hun hmaa inthlantir hi democracy palzutnaah kan ngai a. Chu mai bakah VC zahawmna tihbawrhbanna a ni a, term pawh tawi chhan an sawi hi a nep kan ti hle a ni,” a ti bawk.

VC term pawh tawi chu an do hrim hrim ni lovin a democratic lo hlea an hriat vanga duh lo an ni tih ZALEN a hrilh bawk.

Tuna VC hi August 27, 2020-a inthlang niin sawrkar chuan September 7, 2020 hmaa charge inhlan fel vek turin a ti a ni.