October 5, 2022; 5th Assam Regiment a awm Zorinmawia Chawngthu (28) h/o Lalbiakzuali, Zemabawk chu vawiin chhun dar 12:30 bawr vel khan Himachal Pradesh a paragliding an tihna ah chesualin a boral a, a ruang rawn thlen hun tur chiang taka hriat mai theih a la ni lo.

Zorimawia chhungte hnen atanga ZALEN thudawn danin, Zorinmawia te battalion hi Sikkim a awm an ni a, Himachal Pradesh a India rama force hrang hrangte paragliding intihsiakna neih turah an unit aiawh a tel tur mi 5 thlanchhuah ah a tel a, vawiin lam a practice flight an neihna ah Zorinmawia hi chesualin, rang takin sipai damdawiin an panpui hnu chhun dar 12:30 bawr velah a hliam tuarlo in a boral.

Zorinmawia chhungte chuan a chetsual thu leh a ngaihtuahawm thu vawiin chhun dar 11 bawr vel khan report an dawng tih ZALEN an hrilh a, a hnu rei vaklo a a boral thu report an dawng leh tih an sawi. 

Thudawn danin Zorinmawia hi Himachal a Army hospital ah dah a la ni a, naktuk lamah postmortem tih a ni ang a, chumi hnuah Mizoram rawn panpui tum a ni a, Mizoram rawn thlenpui theih a nih hun tur erawh chiang taka hriat theih mai a la ni lo.

Vanduaina tawka boral Zorinmawia hi Zembawkah a nuho a khawsa niin, a nupui Lalbiakzuali nen fanu thla 8 mi an nei a, kum 8 emaw vel sipai a tang tawh a ni.