Editorial

Himna a pawimawh

Admin - Apr 18, 2021

Sawrkar hian uluk taka ngaihtuahin mipui himna atana tha ber tur ngaihtuah se, kan tuar deuh dawn anih pawhin huaisen takin kalpui ngam teh se

Khawvel pum tibuaitu hripui Covid-19 chuan Mizoram pawh min la tibuai chhunzawm zel a. Hrileng hi han ziaawm deuh thin mahse tinhnai thla 2/1 chhungin nasa takin kan pung thar leh a, kan la pung zel dawn ni pawhin a lang.

Mizoramah chuan hri vei thar hi hmuh a nih meuh tawh loh hnuah tunhnai deuh atang khan phailam atanga lo haw te atangin hmuh a pung thar hle mai a. Hri kai thar hmuh tam zawk hi phai atanga lo haw te an ni a, tualchhunga hmuh tam ber pawh state dang atanga lo haw te nena inkungkaihna nei niin a lang bawk.

Mizoram sawrkarin Covid-19 vei leh vei lo enna atana a hman Rapid Antigen Test (RAgT) hi a dik tawk lo hle niin a lang a. Tunhnaiah pawh Lengpui/Vairengte an lo thlen hlima RAgT test negative, a tuk lawka RT-PCR test a positive an awm nual mai. Chuvangin RAgT ai hian a result hmu dik thei zawk RT-PCR test hi kan kalpui uar a tul hle tih a lang a ni.

Hei mai ni lovin nikum lama phai atanga lo kal te ni 7 chhung khunghran ngei ngei ang chi kha kalpui leh a tul tih a langchiang hle mai. State dang atanga lo haw te RAgT an negative anih pawhin ni 7 chhung inkhung tur a ni chungin inkhung peih lo an tam hle a. Mahni chenna inah inkhunghran tur tih ni mahse chhungkaw tam zawk chuan inkhunghranna hmun kan nei lo bawk a, heng mite hian hri an kai anih chuan a thehdarhtu lian tak an ni thei a ni.

Himna hi a pawimawh a, hri darh zel tur khuahkhirhna anih dawn phawt chuan lockdown pawh kalpui hreh loh mai nise a that a rinawm. Lockdown hian kan economy nasa takin a nghawng ngei mai, mahse kan himna leh damna hi a pawimawh ber a ni. Sawrkar hian uluk taka ngaihtuahin mipui himna atana tha ber tur ngaihtuah se, kan tuar deuh dawn anih pawhin huaisen takin kalpui ngam teh se.