Kum khat dawn kan buaipui tak hripui leng mek Covid-19 chuan ziaawm lam a pan chho zel niin a lang a, India ram ang pawhin thi te kan tlahniam chho rih a, Mizoram sawrkar chuan bituk neiin Inkhawm leh sikul kai te pawh thlah zalen chhoh a tum a, chumi piahlamah sawrkar laipui chuan Covid-19 Vaccination Drive chu India ramah a kalpui chho mek.

Heng te avang hian hri hi a hlauhawm ta lo e, ti zawnga kan rilru kan sen a hlauhawm hle. Hri hi a hlauhawm ta lo a ni lo a, kan state bikah phei chuan inkhuahkhirhna kan kalpui that avanga tun dinhmun hi kan thleng a ni mah zawk. Inkhuahkhirh hi mipui leh ramin a tawrh nasat em avangin sawrkar hian inthlahdul hi a kalpui lo thei lo a ni zawk a, vaccine pawh hi sum tam tak sengin, ram economy in a tuar nasat loh zawk beiseina avanga kalpui a ni tih hi hriat reng a tul.

Inkhuahkhirh na thlahdul deuh a nih dawn avang hian mipui te hi kan fimkhur leh zual a tul a, khawthlang ram lam pawh an inthlahdul boruak an zawh loh avangin hri a leng tha leh nasa hle tih hi kan hriatreng a tul a, nasa zawka inkhuahkhirh that leh a ngaih lohna turin mipui te hi kan fimkhur zual sauh a ngai zawk a ni.

Sawrkar lam chuan inkhawm mai bakah mi tam tak sum lakluhna, Picnic spot te leh gym te pawh thlahdul deuh a tum tih health minister pawhin a sawi a, mi tam tak sum lakluhna hren sak reng chu ram economy tan tha lova an hriat vang a ni ber a, chutihrualin zalen kan chakna hian thil duhawm lo zawka min hruai lut ang tih a hlauhawm hle a ni. Mihringin duhthlang thei turin finna kan nei a, chuvangin kan himna pawh thui tak kan kutah a awm a, kan zalenna hian kan himna a tichhia ang tih hi a hlauhawm tak zet a ni.