Khiangawia film atanga Sap, Korean leh vai film thlengin mizo tawngin kan let a, hmuhnawm titakin kan en thin. Chutiang bawk chuan Mizo film pawh Hindi-a en theih turin chhawpchhuah a ni ve dawn ta rup mai - M SPACE kut chhuak 'LALPA A THA' tih chu Hindi-in lehlin mek a ni. 

'LALPA A THA' tih film hi tlangzarh a nih phat atang khansawi hat a tling a, a hmuhnawmin zirtir a nei tha hle a nih kha. Mi tam takin Mizo film chhuak tawh zinga an dah san ber pakhat a tling phak a, Kristian film tha tak a ni. 

He film ngei mai hi Delhi lamah dubbing tih mek a ni a, Hindi-in en tur a awm thuai dawn e. Hei hi hnam dang zingah rawngbawlna atana a tangkai beiseia tih a ni a, a hlawhtlin ngei theih a duhawm hle. 

He film hmuhnawm tak mai hian rilru a hneh a, an original soundtrack pawh tun lai hla lar a tling phak. 'Lalpa A tha' tih hla hi Pu C. Lalzarmawia phuah a ni a, zaithiam hrang hrangin an sa nasa hle. He hla pawh hi Hindi-in lehlin a ni dawn bawk. 

Hindi-a an lehlin hnu hian tawng hrang hrangin lehlin belh zel tum a ni a, M_Space te inpekna leh hmalakna a ropui takzet a ni.