Lr Hrahsel

Dt. 23rd September, 2020 chanchinthar leh Dt 24th September, 2020 chanchinbu hrang hrangah central sawrkar atanga Hindi teacher post 665 lak phalna lehkha a lo thlen thu leh la vat tur a sawrkar phutna NSUI thuchhuahah a lo lang a, a lawmawm hle. Hindi chungchang hi hun eng emaw lai vel atang khan thu thar leh mipuite ngaihven a ni ta deuh a, mipui lamah pawh titi ber a ni emaw tih tur khawpin kan ngaihven tlang pawhin ka hria.

Khatia National Students’ Union of India (Congress party-a zirlai pawl)-in thu thar an han thehdarh leh takah khan order copy ka zawng nghal a, lehkhaah chuan ni 20th August, 2020-a lehkha tihchhuah a ni tih a hriat theih a, chumiah chuan Mizoram sawrkar pawhin Hindi teacher a dil belh lehna letter No. A.11013/1/2019-EDN/169 dated 27.07.2020 pawh ziah lan tel niin mi 1160 tan dilna thehluh leh a ni tih pawh lehkha atang hian a hriat theih nghal a ni. A sawi zelnaah chuan - “He department-in dt 4.12.2020-a Mizoram tan Hindi teacher post 665 lakna tur a lo phal tawh sa chu a rang thei ang berin tipuitling/la fel hmasa phawt rawh u,” (a tawi zawngin) tiin a inziak kalh mai a, nikum 2019 lama post 665 lakna tur an lo tihfel tawh chu tihlawhtling turin central sawrkar hian a ti ta a ni. Mizoram sawrkarin post 1160 a dilna tihhlawhtlin a nih tak hrih si lohah chuan sawrkar tan hlawkna nge chânna ni ta ang tih ka ngaihtuahnaah a lian hle.

He thu kal zela ka rilru a lo lang ta chu - Congress sawrkar khan Hindi teacher 1305-te chu state sawrkar hnuaiah la lut thei lo in an lo mai par thlawntir tawp tawh a, khang mite kha an khawngaih thlak hle. Chhuhngkaw chawm nan leh chhungkaw innghah nan kum kha leh chen sawrkar tan theihtawp chhuahin hun an hmang a, an vanglai, an tana hna dang dilna tur chance tha tak tak kal pelin a tawpah hun khirh tak an tawng ti ila kan sawi sual tam lo ang. A pawi teh e.

Tunah MNF sawrkarin mi 1160 tan dilna a thlen nawn leh a, central sawrkarin post 665 atan lak phalna a lo pe leh ta a, state sawrkarin a dil ang zat phalna a pe lo pawh hi lehlam zawnga thlir chuan a lawmawm hle. A chhan chu - scheme tawp hunah a mai par thlawntir leh tawp dawn nge scheme tawp hunah state sawrkarin an tan ruahmanna tha tak siam a nei em tih hi ka thinglungah a lo lian hle. A tawpah hawisan an ni lerh ang tih hi ka lo hlauhpui tak zet a ni. Central-in post a pek hnem ringawt avanga politics thil avanga lak teuh a, a tawpah kalsan an nih leh dawn ai chuan mamawh zualpui a lo phuhru thei a nih a, a tawpah state sawrkarin a chhawr chhunzawm zel theih dawn chuan chu tluk a hlu an tan a awm chuang lo ang. Tin, Mizoram sawrkarin Hindi teacher hi la leh dawn a nih dawn pawhin RTE Act-in a phut angin a tlingte ngei a lak kan beisei bawk a ni.

Sawrkar hna neih tawh hi chuan hna dang dil remchang tawh lo, mahni hna lamah rilru leh taksa pek ngai thil a lo ni tawh a, buaithlak tak hi a ni. Tunah pawh hian rural development hnuaiah pawh hnaa chawl mai tur/bân mai tur an awm niin ka hre bawk a, anniho pawh hna dang dil turin an kumin a pha tawh dawn lo a, khawngaihthlak tak an ni. MNF sawrkar tirh khan Rural Development hnuaia hnathawk thenkhat chu state sawrkarin a regularised a; nimahsela, a hna hniam thawkho erawh chawl mai tur dinhmunah an ding mek bawk niin ka hre lo bawk a, an hmakhua a va thim dawn bik em. An tawp hun tur an ngaihtuah tha ngamin ka ring lo. ‘Sanghar-a lunglawm, Ar-a lungchhia’ an tih ang deuhin - a sang lam an dah nghet a, a hniam lam an mai par thlawntir dawn a nih hmel a, hna atanga thlawn turho tan chuan ei zawnna dap leh a buaithlak khawp ang.

Kan state-ah chuan nu leh pate hian kan fate chu sawrkar hna nei turin kan fuih tlangpui a, chumi tur chuan kan zirtir tlangpui bawk. Sawrkar hna hi chhungkaw innghah nan kan hmang deuh vek ti ila a sual tam lo ang. Hri leng avanga lockdown neih a nih chiah khan keini state angah chuan sawrkar hna duhawmzia chiang takin a lang thei ti ila a dik awm e. Chuvang chuan sawrkar hian a hnuaia thawk tura a lakte (eng scheme atang pawhin nise) hi an hna atanga a chawlhtir dawn a nih chuan security tha tak siam sak zel tawh se tih hi a duhawm hle mai. Lak hnema bân hnem leh aiin, lak tam loh a innghahna atan a an hman zel theihna tur security hi sawrkar hian a ngaihtuahpui ve an ngai tak zet e.