ZALEN October 3, 2025: MPCC President Lal Thanzara chuan Congress Bhavan-ah mi lawmluhna a nei a, 'Khawvel thilah leh thlarau thilah pawh inti sual lovang' tiin Congress party-ah a lawmlut. Prime Minister Narendra Modi-a'n RSS kum 100 tlin lawmna atana Cheng 100 thir a tlangzarh-ah hindu pathiannu lem chuanna thir tanka hi Biak In-ah thawhlawm atan hman a la nih tur thu a sawi.

Lal Thanzara chuan, "Kan ram, kan hnam, kan sakhua tana hlauhawm BJP chungchang hi sawi tam tawk a awm thei lo. RSS kum 100 tlin lawm nan PM Modi an Cheng 100 thir a tlangzarh ah Hindu pathiannu "Bharat Mata" bakah RSS volunteer-te kum 1963 Republic Day parade tarlan a ni hi a demawm takzet a. RSS te hi India zalenna sual nan a thawh nei lo, British-te thlawp zawk tu an ni. ₹100 coins hi thiam taka RSS tena India ram Hindu Lalrama siam an tumna kal zel a ni. He Bharat Mata hi 1905 khan RSS mi leh sa Abindranath Tagore ziah a ni a, Hindu pathian nu lem a ni," a ti.

"He cheng 100 thir hi Biak In kan inkhawmnaah thawhlawmah kan la hmang dawn a ni. BJP te hian an ti nghal phut phut dawn lo, muangchangin Hindu Sakhuaah hian min um luh vek an tum a ni. Keini Mizo kristiante hian kan sakhuana ti dal khawpin development sum te hi a thleng nan kan phal lo a ni. Hindu kulhmuk pawl Kristian te nekchep leh kan missionary te pawh missionary inti ngamlo khawpa siam mektu te kum 100 tlin lawm nana Prime Minister in cheng 100 thir a tlangzarh hi RSS tena an pawm ngai loh leh siam danglam an tum reng leh an chak em em Constitution of India hmuhsitna a ni a, a demawm tak zet zet a ni," a ti bawk.

Tlawng lei chungchang sawiin, "BJP te nena thawkho kan sorkar hrawn mek hnuaiah Mizoram inkal pawhna kawngpui pawimawh tak, sumdawng, zirlai, VIP leh mi nawlpuiten an zawh mek, Airport kawng, Sihhmui rama Tlawng kai lei hi an dawh zawh atanga Ni 180 hnuah pawh an la hawng thei lo cheu hi a mak hle a. September ni 15 khan department lamin hawn an tum a; mahse, tun thlengin an la hawng thei lo. Hei hi department lam thiam loh nge, Contractor thiam loh tih a hriat mai loh a. Congress party chuan kan enchhin sorkar hian a thiam loh a ni tih pawm se la, peih thuai turin kan phut tlat a ni," a ti.

Tunah hian Mizorama Sport Association hrang hrangte Sport minister chungah an vui hle a. Pathian leh mipuite zara Congress a sawrkar leh a nih chuan Sport infrastructure te hi a enkawl hna Sport Association hrang hrang hnenah hlan leh dawn a ni, a ti.