Aizawl: Nimin khan Agape Social Centre, Positive Women Network of Mizoram (PWNM) leh Light of Hope Ministry te tangkawp chuan Tourist Lodge-ah 'Heart to Heart Meeting with Namkwang Presbyterian Church Youth (S.Korea)' an nei a, he inhmuhkhawmah hian Health Minister Lal Thanzara chu khuallian niin HIV/AIDS do kawngah kut kuangkuah thei an awm loh thu a sawi. Lal Thanzara chuan, “Mizoram chu India rama HIV vei tam ber dawttu kan ni hi a vanduaithlak a, a doletna kawngah Mizoram mipuite kan tanrual loh chuan AIDS natna hian min vaihma vek thei a, chu vangin a doletna leh a laka invenna kawngah tumah Kut kuangkuah thei kan awmlo,” a ti. AIDS doletna leh a laka invenna kawngah Sawrkar chuan nasa taka hma a lak thu tarlangin, tun hnai mai ah pawh US Ambassador to India in MSACS Office a tlawh tumin AIDS doletna kawnga thawhpuiah Mizoram Sawrkar chuan a sawm thu a sawi bawk. Lal Thanzara chuan AIDS vei kalkhawm te chu AIDS natna avanga lungngaia indawmkun mai loin, engkim tithei Pathian nung rinchhana huaisen taka nung turin a chah. Inhmuhkhawmah hian South Korea Namkwang Presbyterian Church atangin khualtha thahnem tak, tualchhung atangin mi thahnem tak leh pawl hrang hrang aiawh te leh Heart to Heart member (HIV veite) an tel.