Aizawl: Zirbingnain a tarlan danin Mizoram chu HIV/AIDS vei tam lamah a sang lawr lak a, mi cheng 2.04%-in AIDS/HIV an vei mek a, he natna tihdam theih loh hian mimir (general population)-ah bu a khuar nghet tawh hle niin tarlan a ni bawk. Hetih lai hian zirchianna dangin a tarlan danin Kohhran rawngbawltu atangin inthinhrikna (stigmatization) a la nasa hle bawk. National AIDS Control Organization (NACO) chuan HIV Estimate 2017 tichhuakin 2018 thlirlawkna a ni a,micheng 2.04% chu HIV/AIDS vei an ni mek a, Mizoram chu India ramah a sang berah awm mekin 1.43% in Manipurin a dawt a ni. “Kan damlo enkawlah hian KS leh drug addict-te aiin mi pangngai (normal person) kan tih hi an tam tawh hle a, KS leh addict te aiin heng mite hian an pu darh chak zawk a ni,” tiin Dr Lalchhanhima, Synod Hospital Durtlang chuan Zalen a hrilh bawk a ni. “NACO-in Estimate a a thlir lawkna hi a dik duh khawp mai,sex hi inkaichhanna ber chu a ni,” tiin Dr Richard Lalramhluna Chawngthu MSACS chuan a sawi bawk. Ram pumah tlakhniam a pan laiin state 5-ah la pung zel a- Arunachal Pradesh (65%), Assam (37%), Mizoram (18%) Meghalaya 10% leh Uttarakhand-ah 4%-in 2017-ah a pung a. Manipur leh Nagaland-ah chuan HIV vei thar hi 10%-in a tlahniam thung a ni. Dr. Lalchhanhima chuan Kohhran leh thalai hruaitu (Leaders & OB) 293 a kawmnaah HIV/AIDS veite nen Biak Ina thutthlenga thutho nuam an ti lo a, 92%-in no leh inthiarna inhma tawm an duh lo thu an sawi bawk a. HIV veite chu Pathian hremnaa ngai 32.1% niin 66.9% chuan Bible zawm loh vangah an ngai a, Mawngkawhur HIV veite chu 77.1%-in an phu vang rengah an ngai bawk a ni.