Health Minister Lal Thanzara chuan Assembly Session kal mekah Mizoram chu HIV/AIDS vei ngah ber dawttu (Pahnihna) niin a sawi a; HIV/AIDS a lo luhna a la rei lo ang hu a hetiang dinhmun kan rap ta mai hi a rapthlakin a thlamuan thlak loh hle a. HIV/AIDS do te; a laka invendan inhrilhhriat thawm te a rin ang huin a sang filawr pawlah kan awm ta chu a ni a; hetiang deuh tho hian cancer leh zial zukah pawh a sang filawr kan ni bawk. Nupui pasal piah lama inkawp satliah hi HIV/AIDS ti darhtu ber pakhat a ni a; sakhua anga ngaihtuah phei chuan a zahthlak ang renga; rawngbawltute tan inenletna ram ram tham a ni. Ram inrelbawlnaah chuan sual reng reng hi '0' (nil/zero) in a dah theih loa, a te thei ang bera daha thunun (control) thin a ni a; HIV/AIDS a kan dinhmun en hian sawrkar ngei pawh a lungawi bik a rinawm loh a, hei aia nasa zawka tan lak a tula; thiamna hman mek te thlengin ennawn a ngai a nih pawhin a ti mai tura ngaih a ni. Kristian sakhua vuan kan ni deuh vek tih hi sawi nawn ngai loa chiang sa a ni a; chu a chhapah mahni kohhran theuhah luankhawmna kan nei vek bawk a, 'kohhran' kan tih hian hemi hi a kawk fo thin reng a ni. Hemi bakah hian kan ram danglamna vawi duai lo kan sawi tawh thin a, chuta langsar tak mai chu kohhranin ram inrelbawlnaa 'aw' lian tak a nei hi a ni. Tunhma khan khawthlang ramah chuan ram inrelbawlna leh kohhran hi chawhpawlh a ni fo thin a; chu chuan thil diklo tam tak a hring chhuak a, kum zabi 16-na leh 19-na inkarah khan ram tam tak chuan Sawrkar leh Kohhran inzawmna chu an chhu chat tawh a; hmasawnna an hmu zawkin an hria a, inthlan politic ah kohhran tam tak chu an la inrawlh tho a, ual au takin an duhzawng campaign pui te pawh an awm. Tunlai khawvelah chuan kohhran hruaitu lawk te ngaihdan chu ramhruaitute chuan zahderna nen an ngaihthlak sak thin a; an thu zawm erawh batah an ngai hauh lo. Tun dinhmunah hi chuan kan ramah hian state sawrkar inrelbawlna thenkhatah kohhran a inrawlh nasa hle a; a dodal hial a tih theih bawk ang. Zu khap burna dan hlih tumna a awm khan thuchhuah siamin kohhran chuan a aw a chhuah tawh a, MLTP hlih a nih loh nana tawngtai rual te pawh a huaihawt tawh hial a nih kha. Titi leng vakah chuan khami zan tawngtai pawh khan dil dan a inang lo hlawm hle a; thenkhatin kohhran in zu awmzia a hriatthiam theih nan te, zu zawrh a hlawhtlin nan te, zu zawrh a hlawhtlinloh nante leh adt. nen a in chawhpawlh nuaih a nih kha! HIV/AIDS do kawngah hetiang chiah hian kohhran hi hma la hlei thei lovin a awm a, insum theih tluk a awm loa, a thei lo tan condom hmang turin helama hma latute chuan an zirtir a. Hri chhia a darh loh nan condom hmang tura NGO te'n an sawi ang hi Kohhran chuan a sawi ve thei tlat lo a, a sawi tur pawh a ni lo. Chutih rualin kohhran mite vek chu HIV kai leh a thehdarhtu an ni lawi si a, a tak ram hmachhawn mai hi a tha tawh mai lo maw? tiin ngaihdan a awm ta hial mai! Kohhran hi thil inzirtirna dawhsan tha ber anga ngaih a nih rualin sim tur khawp chuan a mi leh sa te a thuin a dah thei si lo leh condom hman a fuih theih loh avangin tunah hian dinhmun 'lai' takah a awm a ni. HIV/AIDS vei zinga a tam zawk chu thalai an ni a, nungchangin a zir loh avanga kai ni lo vanduai vang liau liau a kai an awm nual a. Hetih lai hian a tam zawk chu 'sex' a fimkhur loh rah chhuah a ni a; thalai zingah kawppui 2/3 nei an tam bawk a ni. Kohhranin a thunun hleih theih loa an khawsa zel a nih chuan he hrik hi a darh zel dawn a. Tuna HIV vei thalai te hi nakin lawkah chuan liam mai tur a ni a, midanga a darh lohna turin zirtirna pek uar sauh a pawimawh a ni. Eng pawh nise a theih chin chinah tun aiin kohhran hian hma la uar sela, rilru zau zawk a put thiam a pawimawh hle. He natna vei zingah thehdarh zawnga khawsa an awm nual a, HIV/AIDS kai tawhte chu an mawhphurhna kohhran hian hrilhin fuih mai thin sela hma kan sawn ngei a beisei awm.