DOWNLOAD OUR APP

Read latest news on your phone
app-store

HIV/AIDS kan do danah herrem ngai a awm nual em?

Dec 05, 2021

Chhungkuaah chhungkaw mil zelin sawi tam a ngai tawh a, inzirtirna kan dawn te hi chhungte hnen ah nu leh paten sawi mawlh mawlh a hun ta hle mai.

Kum tinin December ni 1 ah World AIDS day hman thin a ni a, kuminah pawh kan ram chhungah theih ang anga hman a ni a. Inzirtirna tha zawk thehdarh tumin thisen test te, concert te leh mipui hip thei tur zawng in hun hman a ni a. Kan health minister chuan kan ram dinhmun chu a that loh avangin tanrual a tul tawh hle tih a sawi bawk a ni.

HIV/AIDS a hluar ta hle mai a, san lam kan pan zel bawk a ni. Tun hma kha chuan mahni inzuar leh ngawlveite natnaah dah thin a ni a, tunah chuan  mimirah a lut tawh mithiamte'n an ti a, thisen test tawh zingah 2% bawrin HIV/AIDS an vei ang a ni a. HIV/AIDS do luhchilhtute NGO phei chuan Africa in a buaipui chiam ang hun kha kan hlat lo ni hialin an sawi thin a ni. Mut mawh hnar mawha neih a tul ta hle mai.  

HIV/AIDS leh drug hi inzawm tlat a ni a, tunah hian Mizoram-ah HIV chu sex atangin a darh nasa ber a, a dawtah drug a ni leh a. Tunhnai khan district 2 ah  heroin hmang thar an pung deuh nia sawi a ni a, helai hmunah hian HIV pawh a darh deuh bawk a ni. 

HIV/AIDS veite zinga 65% zet chu hnathawk thei rual (working age) kan tih ang hi an ni a, mimir-ah a darh chak bawk si a, hnathawk thei rual si he hrik pai mek te hi engtik emawah thawk hlei thei loin an awm thei a.Hna thawk thei lo rual kan nei nual dawn tihna a ni a. A vei hi kan pung zel a nih phei chuan ei zawng hleitheilo kan pung zel anga chhungkaw inchawm hleitheilo tam tak an awm thei tih lam a kawk a, a nghawng hi a nasa dawn tih a lang a ni. Hetiang hi kan dinhmun a nih tawh avangin he hrik hian min chenchilh tawh dawn a, thunun turin nasa zawka tan lak a tul hle mai.

Ngawlvei inchiu thinte’n hri an inkaidarh loh nan syringe thianghlim te sem a ni thin a, enkawl an ngaih chang pawh a an tluk luhna tur ‘drop in centre’ tia hriat lar thin chu khawtlang bawkin hnawk kan tih avangin a tawp ti tih ta ti ila kan sawisual lo ang. Heng centre te hi HIV darh zel ven nana hmun tangkai te an ni a, thil tha lo ken tel nei thin mahse dawh thei taka ‘kan hling pai’ kan tih ve mai hi a hun tawh niin a lang a ni. Khawtlang bawk hian drug leh HIV kan do dan hi kan ngaihtuah nawn leh a ngai hle a ni.

HIV/AIDS sawi hian kohhran mawh a sawi loh theih loha, tunah chuan kohhran huang chhungah pawh hmalakna hmuh tur a awm tawh a, tun ai uar leh nasa zawk bakah rilru herremin zau zawka hmalak ni zel sela engtik niah emaw chuan rah tha zawk a chhuah beisei tlat bawk ila.

Sawrkar, NGO, khaw-tlang leh kohhran ang tein HIV/AIDS darh loh nan thapui  chhuah mah ila a pawimawh ber chu mimal anga zirtirna kan dawn te zawm mai hi kan tih tur a ni tawh a ni. World AIDS Day hman hi duh tawk mai lo  ila a huho tak meuha nitina kan do a ngai a. Chhungkuaah chhungkaw mil zelin sawi tam a ngai tawh a, inzirtirna kan dawn te hi chhungte hnenah nu leh paten sawi mawlh mawlh a hun ta hle mai.

Share now