November 26, 2023; Chanmari Presbyterian Kohhran, Aizawl chuan vawiin (26.11.2023) Sunday School inkhawmah an kohhran member pahnih, Kristian Hla Bu No. 129 'Khawvel thim en tura chu' tih hla phuahtu Pu Thandanga (kum 93) leh KHB No. 121 'Kum sul liam hnu kan nun ngaih lai tho leh thin' tih phuahtu Pu C. Lalkhawliana (kum 86) te chawimawina hun hmangin, chawimawina thuziak leh pawisa fai Rs. 5,000/- ve ve an hlan a, an hla phuahte hi kohhran mipuiten an sa ve ve bawk.

Pu Thandanga hi taksa chak lohna vangin he hunah hian a inkhawm thei lova, KHB No 129-na a phuah dan leh lawmthu a sawina recorded ngaihthlak a ni a. Pu C. Lalkhawliana hian kohhran mipuite hmaah KHB No. 121-na a phuah dan ngaihnawm takin a sawi.

Pu C. Lalkhawliana hi MJA president lo ni tawh leh Mizoram a saptawng chanchinbu hmasa ber Highlander editor ni mek a ni.