- Vanlalruata- Vanlalruata Pathian thu sawifiah nana GREEK tawng kan hman thin chuan GREEK ram dinhmun atang hian kan inhmufiah thei dawn lawm ni? Tun hnai lawka Greek (Greece) ram economy tluchhia leh an ram buaina kha kan la hre hlawm turah ka ngai a. Hun rei tak an inrelbawlnaah fimkhur lo takin an kal a. Thatna tur lam aiin a nuam leh awlsam an bawh a. Hlawh leh inrelbawlna, milian ho nawmchenna ti hiala sawi theihah an inhmang zo a. Chumi avang chuan an ramah hmasawnna hna thar lian tham an thawk thei lo a. An hmasawnna ruhrel neihsa an enkawl hlei thei lo a. Eizawnna hna thar an siam thei lo a. A ram buaiin an buai a ni. An buaina lak atanga inhaichhuahnan European Union-a an telpui ram te hnen atangin tanpuina leh loan an la nghek nghek a. Mahse chung tanpuina leh loan an lak chu inrelbawlna atan an hmang zo zel a. An rul thei si lo. Anmahni pui thintu ten an kal dan an hmuhchian avang leh an puk tir rulhna an hmuh si loh avangin an pui tha duh lo zui a. Chumi avang chuan an intualvuak lo chauh a. Tun thleng khuan an buai ru em em reng mai anih khu! Kan ram hi inbihchiang ve ila. A hma lama sawi tawh angin kan budget atanga 80% deuhthaw hlawh leh inrelbawlnan kan hmang zo vek a. Hnathawhnan 20% vel chiah kan nei a. Kan thawhchhuah pun vang ni miah lo; India in min pek tam zel avang leh kan puk huai avangin kan budget a pung thur thur a. Mahse chu budget pung thur thurah chuan hlawh leh inrelbawlna senso, nawmchenna tia sawi theih hial chu a pung chak em em a. Budget pung, hnathawhna tur pung hlei thei si lovin kan kal rei ta hle a. Hmasawnna ruhrel liantham, hna thar tipung tur kan siam hlei thei lo a. Kan hmasawnna ruhrel neihsa pawh kan enkawl hlei thei lo. Project ropui hmel tak tak sorkarin a siam a. Mahse chumi project atana kan state in kan lo tum ve ngai chu kan tum hlei thei lo a. Chu chuan hna a tisukuk nasa thei hle a. Chumai ni lovin chu project atana pawisa lo kal chu hlawh atan leh inrelbawlna atan kan pawt peng lo thei thin lo a. Project kan siam tam ber hi chu hmasawnna hnathawhnan hmang lovin chhungkhat laina leh duhsak zawng te hna pek nan kan hmang a. Chumi tuartu chu mipui kan ni leh si thin a. A pawi a ni. Hetianga thuneitu leh thawktu ten an chan tur an siam thiam lutuk hi kan rama a mangan thlak lai pakhat a ni. A thlawna thil sem hmanga hma kan sawn theih loh zia hre reng chunga sorkarin a kalpui zel chhan chu a dawngtu aia a semtu an hlawk zawk vang a ni ka ti thin a. Tuna kan sorkarin a chhuanvawr NLUP te hi heti hian bihchiang thuak ila: An sum sen tawh hi sorkarin a sawi danin cheng vaibelchhe 2,800 a ni a. Congress Party thalaiin thuchhuah an siama an ziah danin chhungkaw 1,31,521 in an dawng tawh a. An pawisa sen cheng vbc 2,800 hi a dawngtu chhungkaw 1,31,521 te hian Rs 2,12,893-in an insem thei tihna anih chu. NLUP dawngtu te hian cheng nuai 1 an dawng si a ni lawm ni? Nuai khat dawng tling lo engzat nge awm? Tute emaw chu an hlawk hle tihna a ni. Hei hi mipuiin kan hriatthiam a tul a ni. Hetianga kan kal hi hliahkhuh turin data (report) diklo kan siam thin a. Pawisa min petu pui ber India sorkar bum kan tum a. (Kan bum tumna hi an lo hrechiang em em zui a). Exam-naa entawna pass ten an zirtirtu te an bum emaw an tih laia anmahni zawk an intichhia ang chauh hi kan ni. NLUP te hi special package angin sawi thin mah ila a sum rawn petute hi chuan thil chi hrang hrang atana min pek kan phuahkhawm mai mai ani tih an hrechiang em em a. Kan entawn hi min hmu lo der mai mai a ni. Thawktute hlawh leh hamthatna tihpun tuma kal ai chuan kan ramin hma kan sawn theihna tura ke pen kan mamwh tawh zawk a ni. Kan budget pawisa hi mipui tan, hmasawnna hnathawh nan hman a hun tawh a ni. Greek ram pawh an tanpui a, an tanpui zel a, an kal ve zel a. Tanpuituten kalphung an thlak a, insiamthat loha pawisa an pek duh loh china an buaizia kha kan hriat kha. A hma kha chuan State sorkarten kum tin PLAN siamin chu chu Central-a Planning Commission-ah an sawi ho a, an chingfel thin a. Tunah chuan chu kalphung aiah chuan kum 5 daih tura duansa, PLAN awmsa milin India in pawisa min pe tawh a. Duh ang anga tal theih ni lovin ruahmanna awmsa zulzuia insiamtha zawnga kal kan ngai tawh a ni. Tunah hian Fourteenth Finance Commission Recommendation chhungah kan awm mek a. Hei hi Kum 2015 – 16 atanga 2019 – 20 thleng huam a ni. Hemi hun chhunga Mizoramin Revenue Receipt-a sum a hmuh beisei chu cheng vbc 4,815 a ni a, hemi hun chhung veka Revenue Expenditure-a sum a sen tura chhut chu cheng vbc 34,767 a ni a. Pawisa indaihlohna tur hi cheng vbc 29,952 a ni. He kan sum dinhmun chhe lutuk min siamthatpuinan hian Revenue Deficit Grant cheng vbc 12,183 min pe dawn a. Chuti chung pawh chuan cheng vbc 17,769 in kum 2020 kan thlen khian kan indaih lo dawn a nih chu. Kan hmabak hi a thim a sin. Hei hi hlawh pun lovin a ni. Pun phei ila engtin nge ni ang? Cheng vbc 20,000 velin kan indaih lo dawn a sin… Kan hmabak, kan thlahte hmabak leh hmakhua hi ngaihtuah tur kan ni dawn lawm ni? Fatu hlui hi kan la tihbuk belhchhah dawn nge kan insiamtha dawn?