Mi hlawhtling te hi an thil tiha an tui vang leh an thawh rim vang ngawr ngawr a hlawhtling an ni lo. Nitin hun hman danah chin than (habit) an nei a, chu chu an mahni pawhin an sawi lar ber a ni. 

Khawvel hriata mi hlawhtling tam takte hian zing an thawh ve leh atangin an hun hman dan tur an ruahman lawk thin a, nilenga hun nuam tak hman an duh thin. Zing an thawh atanga an hun hman thin dan chuan hlawhtinna an chan theihna kawngah nasa takin a pui thin niin mithiamte chuan an sawi tlat mai, i han tarlang teh ang. 

* Mi hlawhtling kan tih tam zawkte hi zinga rei tak tak mu thin an ni ngai meuh lo! An mut rei zawng tur hre lawk sain hun an hmang a, a hun takah an tho thin - chu chuan nilenga an hun hman dan turah kawngro thui tak a su a ni. 

* Zing thawh hlimah coffee an in nghal ngawt ngai lo a, tui sik an inhmasa phawt thin. 

* Taksa sawi zawi an ngaipawimawh a, chumi atan chuan hun an insiam thin. Zingkarah taksa an sawi zawi a, chu chuan an rilru ngaihtuahna thlengin a pui thei. 

* Zingkar boruak thiang tak chu chanchinbu chhiarna hun atan an hmang thin bawk a, chu chuan hriatna kawngah nasa takin a pui ta thin a ni. 

* Hna chungchangah thutlukna siam ngai a awmin zingkarah an ngaihtuah lawk a, hna tan hmain thutlukna fel tak an nei lawk thin. Chu chuan hmalam hun atan nasa takin a pui a, inrelbawlna felfai zawk a thlen thin. 

Heng a chunga kan tarlante hi mithiamte zirchianna atanga lak chhawn a ni a, an hun hman dan hi a inang diak diak tihna erawh a ni lo thung - mi hlawhtling nawlpuite hun hman dan an zir chianna atanga khaikhawmna a ni e.