Tun hnaia khawvel huap leh India ram pum huap inelnaa hlawhtlinna chang Mizorama sports association pahnih, Muaythai Association of Mizoram leh Mizoram Arm Wrestling Association hnenah Thawhlehni khan Mizoram States Sport Council (MSSC) chuan lawmpuina a hlan.

Conference Hall, Hawla Indoor Stadium, Republic Vengthlanga hun hman hi C. Lalrinzuala, Jt. Secretary, MSSC-in hmanpuiin infiammite a lawmpui rualin a fuih a, “Sport department a awm reng laia MSSC din a nih chhan chu sport tihhmasawnna tur a ni a, infiammite tan sorkar hian mahnia inrelbawl sport council kan neih ngei a ngai a ni,” a ti bawk.

MSSC-in lawmpuina a hlan pakhat zawk, Muaythai Association of Mizoram atang hian Senior World Muaythai Championship, Bangkok, Thailand-a May 3-13, 2023 chhunga neihah hian India aiawhtu Mizo tlangvalin bronze medal a la. June 26-30, 2023 inkara Muaythai National Championship, Film City, Chenai, Tamil Nadu-a neihah final lut vekin gold medal pakhat leh silver medal pali an la bawk.

Mizoram Arm Wrestling Association hian Sheru Classic Tournament, Delhi-a June 16-18, 2023 chhunga neihah arm wrestler panga tirin paliin medal an la a, gold medal pathum leh bronze medal pakhat an hawn.

Heng hlawhtlinna an chan avang hian R. Lalrinmawia, MPS, Senior Sports Promotional Officer kaihhruai inkhawmah hian lawmpuina leh chawimawina hun hman a ni.