Aizawl: Nimin khan PRISM chuan an office, Upper Republic vengah hlemhlet do ni ‘International Anti Corruption Day’ an hmang a, he huna thu sawitu PRISM President Vanlalruata chuan, “PRISM kan sawrkar chuan tih tak zetin corruption hi kan do dawn a ni,” a ti. International Anti Corruption Day hmanna inkhawm hi PRISM Treasurer HK Liansawta chuan a kaihruai a, PRISM President Vanlalruata chuan thu sawiin, “PRISM hi political party-ah kan inleh vangin corruption do hi kan kalsan tihna ni lovin a aia nasaa kan do theih nana ti kan ni,” a ti a. “Kan ramah eiru hrem ngam sawrkar kan duh a, kan party-in sawrkarna kan chang a nih chuan Chief Minister hlui pawh hmuh tur a awm ang,” a ti bawk. Vanlalruata chuan Mizoram sawrkarin day chi hrang hrang a hman thin laia Mizoram mamawh ber Corruption day a hmang thei lo chu insiam that a ngai hlea a hriat thu a sawi bawk. PRISM General Secretary Lalrinzuala Chawngthu-in report a pek danin an hmalakna avangin eiru lungin tang 1, bân 4 leh suspend 16 an awm a. Diklo taka compensation hmuh tum hmu lo 380, mi chanai eiruk sak pelet 107, dik loa hnathawktu lak bân leh 57 bakah mipui pawisa kalral tur humhim vaibelchhe 1950 vel a awm niin a sawi.