Zanin dar 9 hian Premier League club hlun leh inhal Liverpool leh Manchester United chu Old Trafford-ah an inkhel dawn. Zanin inkhel hmuhnawm bik nachhan tur chu English club inhal leh inhaw tak an nih piahah hian Liverpool hi an chak zawk a nih chuan point 21 hmuin table hmahruaitu (nizan Chealsea inkhel result in a hril thei) an ni thei dawn a, point 14 nei a paruknaa awm mek United hi tun hnai an chet fuh tawk loh vangin, zanin inkhelah hian an chak zo lo a nih chuan, an coach Ole Solskjaer an ban thut thei thung.  

Club pahnih hi English club-ah chuan record nei tha tak pahnih an nih rualin tun hnaiah erawh an dinhmun a inthlau ang reng hle a. United hian kum 2017 Europa League an chawi bak trophy ropui chawi an la nei leh lo. Chutih laiin, Liverpool lam erawh tun hnaiah Premier League bakah Europe-a trophy ngaihhlut ber UEFA Champions League nopui chawiin an ri bung bung thung a nih kha.  Tun hnaiah United hi an chetha tawk lo hle a, league match hnuhnung game thumah tum khat an draw tih loh an tlawm ve ve a, zanina an hmachhawn tur Liverpool lah tun season Premier League-a la tlawm lo an nih mai bakah hmanni lawkah club ropui Atletico Madrid an muala hneh zo hlim niin inrin tawkna nen Mohamed Salah, Sadio Mane, Roberto Firmino leh Diogo Jota te an rawn thawk chhuak ngeiin a rinawm.

Solskjaer hian Red Deviels a enkawl hnuah Reds hi a la hneh ngai lova, a huphurh ve hlein a rinawm. An inkhelh tur boruak sawiin Ole chuan,”Kan tum tur te hi europe leh khawvel team tha ber zing a mi an ni a, eng result pawh kan nei thei. Tun kum li kalta chhunga an thil tih kan hria a, an thil tih ang tih ve tumin theih tawp kan chhuah dawn. Hneh theih loh an ni lova, nikumah pawh kan hnuaiah an awm. Mahse, nikum kha chuan hliam vangin an buai ve em a, tunah chuan khang player hliam zawng zawng te kha an rawn let leh tawh a ni,” tiin in veng lawk tak chungin an inkhelh tur boruak hi a sawi chhuak a ni. 

Liverpool hian tun season game riat an khelhah goal 22 zet an khung tawhin an lamah goal 6 a lut tawh thung a, table lama parukna hauh mektu Manchester United hian game riat an khelh tawhah goal 16 thun tawhin goal 10 an chhuah tawh thung.