France midfielder N’Golo Kante chu a kaiza tha na vangin World Cup-ah a inlan thei dawn lo a, tun season chhunga inkhelh tam zawk pawh a chan a ngai maithei. 

Kum 31 mi Kante hian season chhung hun tam zawk chu a khel thei tawhin a rinawm loh. A kaiza tha hi August thlaa Tottenham Hotspur nen an inkhelh tuma a tih nat a ni. 

L’Equipe-in ​​a report danin Kante hi World Cup-a khelh turin a dam hman a rinawm loh a, midfielder hi tournament neih turah hian a inpuahchah thei dawn lo bawk a ni. 

Kante awmlo tur hi Didier Deschamps leh France team tan chuan buaina a tling ngeiin a rinawm. Paul Pogba fitness chuan duhthu a sam loh vangin field laia a ai han awh zo tur an awmin a rinawm loh. France hian kum 2018-a world cup an chawi tuma an first choice midfielder te pahnih tel lovin tournament an khelh a ngai maithei a ni. 

An beisei dan chuan Kante hian World Cup hma kar chauh a khelh theih dawn lo emaw an ti a, mahse an beisei loh takin rin aiin a lo na zek bawk si nen buaina an tawh phah dawn ta a nih hmel. 

Deschamps hian September thla khan France international-a dinhmun nghet tak tak player eng emaw zat chu rinhlelhawma a hriat vangin player inhliamte chu World Cup-a inlan turin a thlang dawn lo tih a lo sawi tawh a ni.

Hetih mek lai hian Reece James-a pawhin a khup-ah hliam tuarin England tan World Cup-ah a inlan theih loh hmel. 

Chelsea star Reece James hi, a tira an beisei aiin a khup hliam chu a lo nasa daih zawk niin England boss Gareth Southgate chuan a sawi a. World Cup a khelh theih loh mai a rinawm.