Aizawl; Nimina Kawnpui Joint VC, YMA, MUP leh MHIP te Kawnpui Venglai Branch YMA Hall-a kalkhawm chuan Zirtawpni (Feb.6,2015) a Khankawn rama tualthahna rapthlak tak thleng chungchang an sawi ho. Emergency Meeting chuan Pi Lalnghakliani (54), Kawnpui Vengthar leh Pu Rongura Sailo, Tualbung khua (Pu Lalzuitluanga, Aizawl Chaltlang huan enkawltu) te pahnih Khankawn (Zanlawn ram)-a a huan enkawl lai thlam chhunga rawng taka thattu Hualliana, (Mualvaiphei khua atanga July 10, 2014-a Kawnpui Hmarveng a khawsa ta) thiltih chu an haw tak zet nia sawiin tualthattu hi thuneitu ten a na thei ang bera hrem turin an phut tih an sawi a, tualthattu hi Kawnpui khaw mi leh sa a nihna an hlih sak nghal tih an sawi a. Hualliana chungah hian dan hmanga a phu tawk hremna lekkawh a ni ngei em tih hre turin a thubuai ngaihtuah a nih dan zawng zawng ngun takin an ngaihven zui reng dawn tih an sawi bawk.