Tunhnai mai khan CM chuan Anti corruption building thar sak hawngin eiruk do kawngah hmasawnna a tam thu a sawi a, ACB thawkte chu Central Bureau of Investigation (CBI) mithiam te'n training an pek thu te sawiin eiruk thubuai chhui lai leh court-a vawmluh engngemaw zah an nei mek bawk. Eiruk do hi tawngkam lar tak a ni ta a, a chang chuan sawi chhuah a hlawh zin avangin mipui beng a thlep tawh em aw? tih theih a ni. Eiruk dotu pawl te an awm piang zel a hnapui bera nei an awm nual tawh a ni. Kar thar awm turah hian Mizo Zirlai Pawl (MZP) te chuan politician leh officer eiru lo ber an thlang dawn a, a thawm pawh a ring nghal viau a ni. Kuttlingloa sum lak hi sawrkar danah pawh sual a ni a, pawikhawihna lian tak a nih bakah a hremna pawh a na a ni. Chhia leh tha hriatna hrim hrim atang pawhin eiruk hi thil tih chiah ngaih a ni lo nachungin khawtlang leh ram anga buaipui hlawh tak a ni lawi si a ni. Mi dang chanpual emaw dan kalha mahni thawh chhuah ni lo lakluh duhna rilru hian inchhung khurah pawh nghawng chhe tak a nei mek a, eiru rilru hian ken tel chhe tak tak a nei ngei ngei a, mahni inkil tawihnate, khawtlang laka hel duhna rilru puthmang te hi thil pangngai a ni ngai lo. Midang chanpual chhuh a nih avangin khawi lai lai emawah hlet a chhuah lo thei loa, midangin an tuara chu chuan sum pai inbuk tawklohna a hringa; thil chhe tam tak pawh a pian phahin a rinawm tlat a ni. Mahni mihringpuite chanpual chhuh duh hial khawp rilru aia rapthlak a awm lo. 'Corruption' hrim hrim hi tawngtlang lawn a ni ta der mai a, a thumal hmanna hrim hrim emaw a awmzia hian thil tha lam a kawk loa, a ri hriat a nuam lem lo, rilru tihnualtu a ni a, rik pawh a ri zinga thenkhat rilruah chuan awmzia a nei tawh lo niin a hriat rum rum thin. Hetiang a nih laia Mizo Zirlai Pawlte'n eiru lo ber thlan an tum hi thil thleng zen zen lo a ni a, a tha lama incho chhuahna a nih a beiseiawm hle. Hmasawnna-in thil hlut zawng (value) a thlak fo thin a, sum pai in a lei theih chauh ngaihsannaah khawvel a lut fo thin ni. Kan ramah pawh ngaihsan awm tak tak te chawimawi an ni ngai lo a, tun hnuah zirlai ti tha te nasa takin chawimawi kan inzitir tha leh hnuhnawh a, hetiang lamah hian intlansiak ila, chu chuan khawtlang a siamthat a rinawm khawp mai. Eiru lo ber thlanchhuah hi hlut tur dik tak inzirtirna a ni a, rawngbawlna fawng chelhtu pawimawh a tling thei a, khawtlang siamthat kawngah nghawng tha tak a nei dawnin a lang a ni. Sawrkar hnathawk eiru lo an awm ta lo mai em ni? tih ngaihdan a awm lek lek tawh laia ri hriat nuam (positive approach) zawnga ngaihtuahna sengtute hi an fakawm hle mai. Eiruk huat inzirtir a tha em em a, eiru lo ngaihsan in zirtir nen a kal kawpa pawimawh ang. Politician leh sawrkar hnathawkte hi hlawh neia thawk an ni a, a nihna takah chuan eiruloa hna an thawhin an tih tur an ti chauh zawk a. Mahse mihring hi chawhphur leh fuih ngai reng kan nih avangin thil tih that inhriat tawn sak a tul fo thin a, chumi atan chuan hetiang inelna hi hmanraw tha tak a nih beisei tlat ang u.