Aizawl: Union Home Minister Amit Shah chuan nimin khan Lammualah Assam Rifles te Zokhawsanga an insawnna tur a hawng.

AR insawn tur puala inkhawm, Lammuala neihah thu sawiin Home Minister Shah chuan, “Assam Rifles te hi an insawn ngei dawn a. Tuna an awmna hmun hi Aizawl tan hmun pawimawh a nih angin tangkai taka hman zui zel a ni dawn a ni,” a ti. 

Home minister chuan AR insawn chhuahna tur leh Laldenga Centre lungphum ruala project dang pali hawn a ni te, a bak project panga dang siamna tur lungphum a ni chu lawmawm a tih thu sawiin heng project zawng zawng atan hian vaibelchhe 2500 sen a ni dawn tih a sawi a. “Mizoramin state a nih atanga kum 36 chhunga hmasawnna nasa tak a nei hi ka lawmpui a ni,” a ti.

Prime Minister Modi chuan hmarchhak bial a ngai pawimawh tih sawi bawkin, “Prime Minister Narendra Modi hian tum 53 hmarchhak bial hi a tlawh tawh a, hetianga tlawh ngun prime minister hi an la awm ngai lo a. Hmarchhak bialte hmasawnna hnathawhna tur PM Devine pawh 276%-in tinpun a ni,” a ti bawk.

Thusawitu dang, Chief Minister Zoramthanga chuan, “Assam Rifles chhuahsan tur ram hi mipuiten tangkai taka an hman theih nan hma kan la dawn a. Laldenga Centre sak tur hi mi 5,000 atanga 10,000 inkar len theihna tur niin hei pawh hi tangkai taka hman tum a ni,” a ti bawk.

Nimina home minister-in a hawn takte hi - AR Battalion headquarters Complex, Zokhawsang; Laldenga Centre, Dam & Recreation Centre, Keilungliah, Champhai; Lianchhiari Rûn; Command & Control Centre, Aizawl leh Warehouse, Bairabi te an ni a. Nimin veka home minister-in lungphum a phumte chu Aizawl bypass road siamna tur package 1 leh 3, Zorinpui to Longmasu kawng siamna tur, West Phaileng to Marpara kawng siamna tur leh Aizawla warehouse sakna tur te an ni.

Lammuala hun hman zawh hian home minister hi Raj Bhavan-ah a chawl zawk a, hemi hnu hian Delhi a pan leh nghal a ni.