Aizawl: Home Minister Lalchamliana chuan vawiin chawhnu dar 1:00 khan Forensic Science Laboratory, MINECO ah e-Forensic system a hawng. He system hi chuan rang zawkin misualte hremna atan a pui thei tur a ni. 

Hawnna thu sawiin Home Minister Lalchamliana chuan e-Forensic system chuan nasa takin thubuai rem kawngah a pui dawn niin a sawi a. "India ram Court kalphungah thil tisual a puh te chu finfiahna a awm loh chuan hrem an ni ngai lo a. Mahse he system hi chuan rang zawkin misualte hremna atan a pui thei dawn a ni," a ti.

Forensic Science Laboratory Director H.Sangchungnunga chuan vawiina hawn tak e-Forensic system chu India ram FSL zinga a hmasa ber a ni tih a sawi a. E-Forensics System chu Ministry of Home Affairs hnuaia hmalakna pakhat Inter-operable Criminal Justice System (ICJS) platform pawimawh tak a ni tiin kum 2018 khan hawn a ni a. He project hnuaiah hian dikna hlenchhuah kawnga mawhphurtu hrang hrang - Police, Forensic, Court, Prosecution leh Prison ten anmahni zawn theuha an hmalaknate  khaihlak awm lova awlsam taka an inhriatpawh theih nan CCTNS, e-Court, e-Prison, e-Forensics leh e-Prosecution hmang te in a thlunzawm a ni tih a sawi.

H.Sangchungnunga chuan tun dinhmunah chuan Mizoram Police leh Commissionerate of Excise & Narcotics hnuaia Officer te hman theih turin E-Forensics hi siam a ni phawt tih sawi bawkin Department dangtan pawh hman theih tura hmalak a ni tih a sawi a. Heng e-report-te hi Mizoram FSL atanga tihchhuah a ni ngei em tih leh khawih danglam a nih leh nihloh finfiah (authenticate) theih turin Digital Signature hmanga sign vek a ni a, report dawngtu tur officer-in email leh SMS kaltlanga One Time Password  a dawn hmang chauhin e-Forensics portal ah hian luh theih anih avangin a him tih a sawi a. Hetiang e-report hi Court pawhin a pawmpui thlap anih avangin hardcopy-a hrana thawn ngai tawh lovin, Paperless system hmang tur a ni tiin e-report dawngtu tur lam an inpeih fel hma chu a tul angin hard copy thawn tel zel a la ni hrih dawn niin a sawi bawk.