Hma kan sawn nan Co-operative movement hi hi din a ni

Admin - Nov 21, 2021

All India Cooperative Week vawi 68-na kharna inkhawmah he thu hi a sawi

Aizawl: Co-operation Minister C.Lalrinsanga chuan, "Hma kan sawn nan Co-operative movement hi hi din a ni," a ti.

All India Cooperative Week vawi 68-na kharna inkhawm chu nimina Mizoram State Cooperative Union leh Cooperation Department buatsaih Dawrpui Multipurpose Hall ah neih ah he thu hi sawiin Co-operation Minister chuan, "Cooperation Movement thil tum te, a innghahna lungphum leh a principle te hi a that em avangin society te tan chauh ni lo, sawrkar, khawtlang leh kohhran huang chhung thlengin a seng luh theih a ni," a ti a. "Mipui mimir ten hma kan sawn a, leirem kan rah a, dinhmun tha zawk kan chan theihna tur atan he movement hi din a ni," a ti bawk. Cooperative Week hman zawh tak chu society te leh member zawng zawng te tan intuaitharna ni thei se, an kal zelna tur atana kaihhruaitu tha leh he movement innghahna leh thil tum phawkchhuaka ke an pen tharna atana tangkai a nih theihna turin kalkhawmte leh Cooperative Movement a inhmang zawng zawng te duhsakna Minister chuan a hlan a ni. C.Lalrinsanga chuan Cooperative Movement innghahna leh thiltum chu a ril a, state mai ni lo, ram economy than zelna tur a hril a. Chuvangin, tuna kan kal dan aia tha zawk leh chak leh zual zawkin, kan hmalakna atangin engtinnge ram ei leh bar dinhmun kan siamthat theih ang tih ngaihtuahna pu turin kalkhawmte a chah bawk.

Nimin hun hmanna ah hian hun rei tak Mizoram State Cooperative Union-a hruaitu lo ni tawh thin Lalbiakthanga Pachuau, tun hnaia India President hnen atanga civil mite chawimawina sang Padma Shri Award dawngtu chu lawmpuina hun hman a ni bawk.

Share now