Pathianni zan Premier League-ah hmahruaitu Arsenal leh Southampton an inhmachhawn a, Arsenal lamin hma takah hmahruaina goal thun mah se mual neitu Southampton-in an sut leh avangin 1-1 in an inhnehtawk a, point 1 hlawh chhuak Arsenal-in point 2-in hma an hruai chhunzawm.

Inkhelhah hian Swiss midfielder Granit Xhaka hmangin minute 11-na lekah Arsenal lamin hma an hruai a, St. Mary’s Stadium-ah hian a tir lamah mual neitu Southampton an che fuh vak lo, a bet zawkah an tang deuh char char a, mah se tha thlah mai lovin second half lamah phei chuan a nawrtu zawkah an tang a, minute 65-naah Stuart Armstrong hmangin an si phurh an sut bawk. He inkhelah hian Stuart Armstrong chu player of the match-ah thlan a ni.

An chak loh hnuah Arteta chuan,"Chak leh ngei kha kan duh a, mahse kan chak zawh tak loh avangin kan na a, pawi kan ti hle a ni. Southampton lamin an khel thaa a result kha an phu a ni. Complaint kan nei lo," a ti. 

Arteta chuan,"Chance tha tak tak kan in siam a, mahse engmah lovah kan chantir zel a ni. Premier League-ah chuan hmahruaitu i nih laia i huntha i hmang tangkai theilo a nih chuan nghawng pawi tak a nei thei a ni," a ti. 

Sawi zawmin,"First half-ah khan kan khel tha hle a, game kan control vek a ni. Second half-ah pawh kan khel tha tho naa thil awlsam tak tak hlah kan ching a, keimahni leh keimahni harsatna kan insiam a ni," a ti.

Southampton coach Hasenhuttl chuan,"First half-ah khan kan vannei hle a, goal khat chiah kan chhuah kha thil mak tak a ni. Zam mai lovin rinna chak tak leh huaisenna an bei let a eng nge thleng tih chu kan hmuh vek kha," a ti.  

Arsenal hian khelh 11 atangin point 28 an hlawhchhuak tawh a, Premier League hmahruaitu ni chhunzawm zelin, pahnihnaa awm Manchester City nen point hnihin an inthlau. Southampton hian khelh 12-ah point 12 neiin, 15-na dinhmun an luah mek a ni.

Arsenal hian tun kar Ningani zana Europa League group stage inkhela PSV Eindhoven tlawh turin an inbuatsaih dawn a, Karleh Sunday zanah Nottingham Forest chu, Premier League inkhelah an lo mikhual bawk ang. Saints hi tun kar Inrinni zana London club Crystal Palace tlawh turin an inbuatsaih ve thung dawn a ni.

Pathianni zan  inkhel result  (23rd October 2022)