El Clasico tih hi chu kan hre fo thin tawhin a rinawm. La Liga club lian pahnih inhal em em Ream Madrid leh Barcelona inkhelh sawi nana hman a ni. Anni club pahnih hi Spain-ah chuan roreltu niin an in champion chhawk deuh zut a, hei vang hian an in el mai ni lovin an iner em em a, hmelma kum hlunah insiamin chungnung zawk nih an duh a, club pahnih te hi an inhmachhawn tawh chuan mipui lam pawh an phu suau thin. La Liga champion nih an chak ang bawkin chak zawk nih an duhna hi a lian hle a, an khel pawh a hnuhnawm thei em em a ni. Pathianni zan zanlai khan Real Madrid mual Santiago Bernabeu-ah Barcelona leng lutin mual neitu Real Madrid hi 4-0 teh meuhin an tlawm a, an mualpho chiang hle. 

Minute 28 chhung goal awm lovin an in hnehtawk a, inkhel boruak thlak danglam turin Barcelona tan Aubameyang chuan minute 29 naah goal hmahruai a thun. Barcelona hian nawr zelin minute kaw hnu lekah R. Araujo chuan mawi takin a tauh lut ve leh a, si hnih faia hmahruaiin inkhelh thawh khatna an zo. 

Second-half an tan a Real Madrid a rawn insiamtha thei chuang lo. minute 47 naah an goal thumna tur F. Torres chuan a thun ve leh. Aubameyang bawk rawn lang lehin minute 51-naah Barca goal lina a rawn thun leh a, he goal hi a tirah offside anga phar ni zet mahse VAR hmanga an endik hnuah goal-a pawm leh a ni.

Tun dinhmunah Real Madrid hian gamee 29 khel tawhin point 66 an hmu mek a, table-ah pakhatna an ni. Barcelona hian game khata khel tlem zawkin game 28 an khel tawh a, point 54 an nei mekin pathumna an hauh thung. Heng team lian pahnih te hipoint 12 zetin an inthlau rih.