Lalchhandama Colney

State puitling kan nihna pawh kum 20 chuang lai a lo ni ta. District Council leh UT hun laite nena belh khawm phei chuan upa ve tawh tak kan ni. Hetih lai hian state dangte nena han khaikhin chuan la naupang tak, pachhe tak kan ni.

Chanchin chhe lam leh tha lam sawi tur tam tak a awm ang, chungte atang chuan zir turte pawh kan nei nual ngei ang.

Mi ramte pawn an tih dan angin kan chanchin kal tawh atangin kan hma hun hman dan turte kan ngaihruat thiam thei ang a, insiam that ngai lai leh tih chhunzawm zel tur te kan hre thei ang. Chungte chu vawiinah han zirho tum dawn ila a tha awm e.

Hmanlai: Lehkha thiam kan la tlem hle a, matric pass chin chuan sawrkarah hna tha tak a thawk thei a ni. Ei ru thei dinhmun a ding awm thei takte chu kan ngaisang hle thin, harsa ve takte erawh kan en hniam deuh thin.

Mi lian/officer-fa tawh phawtte chu an sual/zu an in nasa duh hle a, thalai ruihtheihthil ti ve lote chu kan ngai thing hle thin.

Sap kan ngaisang em em a, vaite erawh kan dah hniam hle. Veng tinah biak in kan nei a, biak in khat alawi kan tam hle/huam zau hle thin.

Radio leh chanchinbute hi kan hmang lar hle a, thu leh hla kan dawnna ber a la ni.

Faina kawngah hian kan sang vak lo, kar tawpah, Inrinni, Chawlhni dawnah kan inbual tlangpui thin. Kan bawlhhlawhte pawh tuiluankawr hnai berah kan paih tlangpui thin. Zan rei tak tak thlenga mic-a thusawi, Bible chhiar tihte pawh kan uar hle.

Intihhlim nan cinema en leh a nei deuhin video ente kan uar hle a, cinema ticket-te phei hi chu kan inchuh nasa thei hle.

Thalaite infiamna lamah kan sang lo hle, ram pawn thleng phak kan awm meuh lo. Kan politics-te a tawp hle, a tawi zawng in ti mai ang; mahse, kan ram enkawltu, hruaitute an ni daih si, mak ve ang reng hle.

Tunlai: Khawvel dangte ang bawkin computer leh a kaihhnawih, smartphone ten Mizote pawh mi a chiah hneh hle mai. Tam takin sumdawn nan te, zirlai atan te an hmang tangkai hle a. Hetih lai hian mi dangte tihbuai nan te, hun hlu tak khawh ral nan te a then chuan kan lo hmang ve bawk a. Lehkha thiamte pawh kan lo tam tawh hle mai, veng tinah, khaw tinah, doctor, engineer, etc., kan awm ve fer fur tawh mai.

Hna a vâng, sawrkar hna phei chu a vâng hle a, thalaite company hnuaiah hlawh tlem tete, hahthlak bawk si-ah te kan thawk hlawm, a dang a awm meuh lo a ni ber mai. Hmeichhe hnathawk, pasal fanau chawm kan tam hle a, mipate erawh zu leh a kaihhnawih vangin naupang tetein kan thi zawih zawih reng thung.

Khua a pui ve tawh a, noise pollution, air pollution tihte pawh kan la thu tak hle tawh. Kohhrante pawh a thang nasa, veng tinah biak in pathnih pathum te a ding hawlh hlawm. Lirtheite pawh mi tin mai tih theih deuhthawin kan nei tawh a; mahse, kan kawngpui neihin a zo leh si lo.
Bawlhhlawh paihna te pawh kan fimkhur tawh hle a, zokhaw lamah hlei hlei an lo fai tawh zawk a ni.

Nakin: Hun lo la awm turah chuan kan changkang tawh khawp mai, kan building, lirthei, ei leh inah te mi ram neih bak bak a ni ta tlat mai. Mipuite pawh kan harh thar, tih hreh nei mang lo thin kha tunah chuan dawt var sawi leh a dang te pawh kan ti ta lo. Chutiang bawkin kan politician-te pawh an lo danglam ta - sum tam tak aia hmingthat thlang ngamte pawh an lo kat ve nuk ta mai.

Kan economy-te pawh a tha tawh viau a; mahse, buh leh balah erawh kan la intodelh chuang lo. Ram ngawte pawh kan nei tha leh ta viau mai, luidung nungcha leh sava, ramsate pawh an lo awm thahnem leh ta. Awareness campaign neih thinte mipuiten kan lo ngai pawimawh thin tih a lang chiang hle mai.

Thalaite pawh kan harh thar, kan ngaihsan zawngte entawn satliah ringawt lovin an thawhrimna lamte pawh kan copy ve tan ta. Muang changin hriselna lamah pawh hma kan sawn hret hret zel a, vawiinah chuan mei zu, sahdah hmuam, tuibur hmuam, etc., hmuh tur leh hriat tur an vang ta hle.

Kan hun kal tawha mi leh kan tun dinhmun thenkhatte kan han tar lang a, heng atangte hian eng ang nge kan lo nih, engtin nge kan awm zel dawn tihte chhut peih tan chuan a hriat theih awm e. Kan hriat theuh angin ram leh mihringte hian hun tawng, a tha lam emaw, a tha lo lam emaw kan nei thin. Heng hunte hi pumpelh theih pawh a ni chuang lo va, chu ai chuan fel taka lo hmachhawn dan tur ngaihtuah mai kha a finthlak zawk a ni. Chuvang chuan min fin chhuah thin tur mi thiam kan mamawh a, min tawngtaisak tur sakhaw mi kan mamawh bawk.

Kan ram, Zoram nuam a nih zel theih nan hian mi tinten ngaihtuahna fim tak neih ve thin tum ila, nang i dik chuan, dikna mi dangte i zirtir nghal a, rinawm chuan midang rinawmna ka zirtir nghal, tih inhria ila. Kan ram a lo nawm a, hrisel a, changkan zel theih nan mipuite, mi thiamte zirtirna leh sakhaw mite zilhna pawm a, ngai pawimawh deuh deuh thei turin i in buatsaih ang u.