Aizawl: Indian Council of Agriculture Research (ICAR), Kolasib chuan Mizoram hmar lamah kumtin ruahtui tla a tam tial tial laiin, chhimlamah chuan ruahtui tla a tlem tial tial thung niin an sawi. ICAR, Kolasib scientist te hian kum 35 kalta chhunga Mizorama ruahtui tlak dan chu uluk takin an chhinchhiah a, ruahtui bakah thlasik laiin kumtin khua a ro telh telh tih an hmuchhuak a ni. Hetianga kumtin ruahtui tlak dan a danglam zel avang hian thlai chin dan leh a chin hun pawh thlak danglam a tul zel dawn niin an sawi a, thlasik thlai chinna tur atan fur ruahtui khawl a pawimawh zia hriat a that thu leh ruahtui tlak tam laia thlai chin chi thlan thiam a ngaih niin an sawi a, thlasik laiin tui mamawh tam lo chi thlai chin thiam a pawimawh thu leh kum khatah vawi hnih, vawi thum thar thei thlai chin dan hriat a tul thu an sawi a ni. ICAR, Kolasib hian Mizoram pumah Centre 25 an nei a, heng zinga centre 13-ah ruahtui tlak dan record hi vawn a ni a, centre 12 chu a thar anih avangin tun dinhmunah record an la vawng ve lo thung. Kum 2019 atang chuan Centre 25-a record te chu an hman theih tawh dawn avangin loneitu te pawhin chiang lehzualin an thlai chin dan tur an hriat theih tawh tur thu ICAR mithiam te chuan an sawi bawk.