October 5, 2022; Nimin (October ni 4) khan Mizoram hmar tlangdung khua, Khawruhlian leh Mauchar a vanduaina thlengah mi 3 in nunna an chan a. An zinga mi 1 chu hnamdang Silchar lam mi niin, midang pahnih chu Mauchar leh Armed veng mi an ni.  

ZALEN thudawn danin, Thawhlehni tlai dar 4 vel khan Mauchar leh Zohmun inkar kawngah leiminin Mauchar nu pahnih feh haw a hnawl a, Lalbiaksiami (65) w/o Ngurkhuma Mauchar chu a hmunah a boral. Nizan khan lumen niin, vawiin chhun dar 12:30 khan vui a ni. A thiannu Tharpuii chuan a khup hnuai lamah hliam a tuar a, ngaihtuahawm erawh a ni lo.

Thawhlehni tlai dar 4 bawr vel vek khan Aizawl lam atanga Khawruhlian khaw thlen hma deuh ah, ruahsur vanga lei leh chirh tawlhin, Telecom Company motor Bolero AS 11 U - 1295 a hnawl a, mi 2 chuangin, driver Gore Barbuya (19), Silchar chu kawng thlang kham sang takah a tla a, motor a chuang pakhat zawk erawh a him a, Khawruhlian YMA leh mi tlawmngai ten an zawng nghal a, vawiin chawhma lam dar 11:17 vel khan hmuh a ni.

He chetsualna thlen hnu tukin dar 2 vel khan hmar lam atanga Aizawl lam pan, Thandanga Hnamte, Armed veng Alto car chu Bolero tlakna chhak lawk, kawng bal laiah a chesual a, car-ah mi pali chuangin, Lalrinawma (66) s/o Kapthianga (L) Armed veng chu a boral a, midang pathum Armed veng mi vek ten hliam an tuar a, ngaihtuahawm lutuk an ni lo nia hriat a ni. Vanduaina tawkte hi sports minister Robert Romawia Royte, Aizawl East-II Bialtu MLA in helicopter a hire sak hmangin Aizawl ah lak an ni.