ZALEN Jan. 8, 2026: V Zirtluanga Kum 62. S/o Upa V. Lalngera (L) Pangzawl Keltan veng (venglai Branch YMA) chu tukin dar 6:30 khan thawhah vangin ram Thlam ah a thi.

V Zirtluanga hi a nupui leh a fate pahnih nen Thawhtanni khan Hmarcha zut turin ram ah an riak a, tukin lamah a thaw a hah thut a, In lam phone in, hruai turin motor a kal nghal a, hawpui tura an in sawngbawl laiin zing 6:30 khan a boral zui ta a ni.

Zirtluanga te lo neihna hi Khuanghlum ram Tuichang kamah a ni a, khua atangin motor kawng Agri link road a kal theih a ni a, km. 8 vela hla a ni.

Zirtluanga te chhung hi mi taima chhung, zo hnathawk a eizawng, Buh leh Bal ngah thei tak an ni. Amah hi thisen sang nei a ni a, thawhah tak hi chu buaipui ngai khawpin a la nei ngai lo. Vawiin chawhnu dar 2 ah BCM Pastor Rev PC Lalmuankima'n a vui ang.