Mizo tlangval, Joseph Lalthankhuma chu Board of Control for Cricket in India (BCCI)-in India rama cricket inelna ngaihhlut hlawh, Duleep Trophy 2023 a buatsaih turah India hmarchhak tana khel tur zinga thlan a ni a, “A tikimtu mai ka ni dawn lo, Mizo zinga a khel hmasa ber nih ngei ka tum,” a ti.

Duleep Trophy hi BCCI-in kum tin India ram pum zone paruka thena intihsiakna a kalpui thin a ni a. Joseph-a hi North East Zone tana khel tur mi 15 thlan zingah telin kumina amah chiah Mizo a ni.

He intihsiaknaa inlan tur hian nikumah pawh Mizo tlangval pahnih thlan an lo ni tawh a; mahse, khelmual tak erawh an lut phak ta lo va. Ramhlun Venglai Cricket Club batsman Joseph-a erawh chuan khelh phak ngei a tumruh hle.

Hmarchhak aiawh tura thlan a nih hnua Nilainia team inkulhna hmun, Nagaland thleng thla chiah, Joseph-a chuan, “Ka tel a ni tih ka hriat tirha ka rilrua lo awm nghal chu, ‘Squad tikimtu mai ni lovin, Mizo zingah khel hmasa ber nih ka tum ve tlat a ni,’” tiin ZALEN a hrilh.

“Zone dang an tha dawn tih chu hriat sa a ni a; mahse, kan khelh that chuan kan tan thlen sanna chance a that phah zel a ni,” a ti bawk.

A khelhna club tana middle order batsman rinawm, Joseph-a hian cricket a khel hma hle a, an veng club-in academy an siam tirh, amah pawh kum kua bawr vel lek a nih lai, kum 2009/10 vel atang tawhin bat a hum tawh a. An veng club senior team tan phei chuan kum 13 mi lek a nih lai atang tawhin regular takin a khel phak tawh.

Kum 22 mi, hma lam hun êng tak nei hian North East Zone tana khel tura thlan a ni ve chu Pathian vang liau liau a nih thu a sawi a, “Hriselna tha tak leh tha taka khelh theihna min petu a ni,” a ti a. Cricket Association of Mizoram (CAM) hruaitute leh a chhungten theihtawpa an thlawpnaah lawm thu a sawi bawk.

‘Khawvela infiamna pawl (association) hausa ber’ tia an sawi thin, BCCI-in Duleep Trophy a buatsaihah hian Joseph-a telna zone hian eng zone nge an hmachhawn dawn tih leh khawi hmunah nge an khelh dawn tih a la hriat loh va, “Kan rin dan chuan North Zone a ni,” a ti a. “Fixture a chhuah phawt loh chuan sawi theih a la awm lo,” a ti.

North East Zone aiawha khel tura player 15 thlan zingah hian Manipur chu thawh hnem ber niin panga an thawh a, Meghalaya leh Nagaland-in pathum ve ve, Sikkim-in pahnih leh Arunchal Pradesh leh Mizoram atangin pakhat ve ve thlan an ni a. Hmarchhak state zinga mi, Assam leh Tripura chu East Zone-ah an tel thung.

Duleep Trophy hi June 28 leh July 28 chhunga khelh tur niin chak lo an tla nghal zel dawn a, Test Match ang deuhvin, team khatin thawh (innings) hnih zel an nei a, ni li chhung (international Test Match-ah ni nga)-a khelh zawh tur a ni.