Meghalaya khawpuia North East Zone Shooting Championship-a inlan turin Mizo silai kap thiam rual 40-te chu Ningani khan an chhuak a, champion ngei an tum a, an inbeisei bawk.

Mizoram Rifle Association (MRA)-in a tirh chhuah silai kap thiamte hi inelna hmachhawn tur hian thla khat chuang zet an inbuatsaih tawh a. Nikum khan a pum puiah pahnihna an ni a, kuminah erawh champion nomawi hawn ngei an inbeisei hle.

Mizoram team manager Lallianmawia chuan, “Kan practice apiangin ni tin national championship-a kal phak tura point hmuh ngai zat hmu pha hi a zahve aia tam mah kan awm ziah a ni,” tiin nikum aia sang thlen theih ngei an inbeisei a, an tum hle bawk tih ZALEN a hrilh.

Lallianmawia chuan, “Kan beisei a sang a; chutih rual chuan state dang-in an neih ang inbuatsaihna hmanrua pawh kan nei lo va, inelnaa hman tur electronic target pawh kan la nei ve lo va; harsatna lian tak tawka kan che chhia a nih loh chuan beisei a sang,” a ti bawk.

Shillong khawpuia karleh Thawhtanni atanga inelna tan tur hi Inrinniah zawh tura ruahman a ni a, Pathianniah lawmman sem a ni ang. 

Mizoram aiawha inelnaa tel turte hi MRA-in district championship a buatsaiha district tina che tha, 14th Mizoram Shooting Championship-a inlan phak, Mizoram pum inelnaa che tha zuia hmarchhak inelnaa inlan phak tura point hmuh ngai zat hmu phate an ni a. Tun tumah hian an chet that chuan National Shooting Championship-ah hmarchhak aiawhin an kal leh thei dawn a ni.

MRA vice president zinga mi ni bawk, Lallianmawia chuan Shillong-a inelnaa tel tura inbuatsaihna a hautak tih a sawi a, silaimu pawh association-in a tum vek theih loh avangin mahni intum te, thian thate tumsak te pawh a ngai niin a sawi.

“Practice-na pawh air chauh kan la nei a, fire arm bik kahna kan la nei lo va, 3rd MAP shooting range kan hman hawhsak thin a, an hotute chungah pawh kan lawm tak zet,” a ti a. Mizoram State Sports Council (MSSC)-in an tuipui hle bawk tih a sawi.

Mizoram team hi Shillong an thlen hnuah inelna tan hma ni, Pathianni hian official practice an nei dawn a, hei hi inbuatsaihna hnuhnung tur leh intihsiakna hmun tura lo tihchhinna tur a ni.

Mizoram aiawha feh chhuakte hi an vaiin mi 41 niin coach, manager leh assistant manager an tel a. Manager leh a assistant pawh hi inelnaah an inlan tur tho an ni a. Category pariatah inelna neih tur a ni a,huang tinah hian kum bithliah thliar leh a ni bawk.