Mizoram badminton player-te chuan India hmarchhaka state hrang hrangte inelna lian berah gold medal panga, silver medal pahnih leh bronze medal paruk, a vaiin medal 13 vaw chhuakin hmarchhak an awp tan mek.

Nilaini atanga tan, Arunachal State Badminton Association (ASBA)-in a thlen, team leh open inelna, Yonex-Sunrise North East Zone Interstate Badminton Championship 2023-ah Mizo shuttler-te an che tha a, Inrinni khan inelna hi zawh fel a ni.

Open championship-ah hian Joseph VL Ringngheta leh Laldingpuii te tang dunin Mixed Doubles-ah gold medal an la a. Kulikawn tlangval, Jojo-a leh Dingpuii te hian Seeded No. 1 ni chunga inelna hmachhawnin final-ah Manipur player tha pahnih, L. Unikumar Singh leh Naorem Purnima Devi te tangdun chu 21-13, 17-21, 21-18 a deciding game-a hnehin gold an la.

Hmarchhak tournament lian berah C. Lalramzauva, Durtlang a che tha hle a, category pahnih, Under-19 Boy’s doubles leh Under-19 Mixed doubles-ah a kawppuite a champion-pui ve ve.

U-19 Boy’s Doubles-ah hian Lalnuntluanga, Serchhip nen tangdunin Lobsang Choidrup leh Lobsang C. Sherdang te tangdun chu 21-9, 21-15 in awlsam takin an hneh a. Mixed Doubles-ah hian Lalrempuii, Serchhip nen tangdunin final-ah Udayan Saikia leh Anushree Mahanta te inkawp chu 21-17, 21-10 in an hneh bawk.

Under-19 Mixed Doubles-a a champion-pui, Rempuii pawhin category pahnihah gold medal a la bawk a. Serchhip tleirawl hian Under-19 Girl’s Doubles-ah Abigail Lalthazuali, Saron Veng tanpuiin Seeded No. 1 ni chungin final thlengin an tumpuite straight set vekin an hneh a. Final-ah Manipur player, Konsam Gunjan Devi leh Sananu Meisnam te chu 21-11, 21-15 in harsa lo taka hnehin gold an la a ni.

Under-19 Boy’s Singles-ah Mizo rawltharin god leh silver medal an la kawp a. Mizo rawlthar pahnihin final an khelhah Mizoram champion ni mek, H. Lalthazuala, Chanmari West-in 21-16, 21-13 in Saitluangpuia, Ramhlun Venglai a hneh.

Thazuala hiam Seeded No. 2 ni chunga inelna hmachhawnin Saitluanga hi Seeded No. 4 a ni thung a. Saitluanga hian semifinal-ah Seeded No. 1 Himanash Sekhar Das a vaw thla nghe nghe.

Badminton Association of India (BAI)-in a hriatpui Mizoram pawna inelna lianah Mizo rawlthar pahnihin final an khel thei hi thil chhinchhiah tlak tak a ni.

Under-19 Girl’s Singles-ah Lalrinkimi, Mission Vengin semi-final-a Seeded No. 3 Montily Pul a vuak thlak hnuah final-ah Seeded No. 2 Shantipriya Hazarika chu 15-21, 19-21 in a hneh zo ta lo va, silver medal nen a haw a. Rinkai (seeded) lo pha lo chunga final a thleng thei erawh chhinchhiah tlak a tling.

Under-19 Girl’s Singles-ah vek hian Abigail Lalthazuali chuan bronze medal a la a, semi-final ah champion ta, Hazarika a hneh lo a ni.

Junior category-ah hian gold medal lak theihna paruk awma pangaah Mizoram aiawhten gold medal an la a, silver pakhat an vaw chhuak a ni.

Women’s Singles-ah Ramngaihzuali, Ramhlun South-in bronze medal a dawng a, semi-final ah Seeded No. 1 leh champion zui ta, Ksh Maheshwari a hneh zo lo. Men’s Doubles-ah Lalrinawma, Bungkawn leh Laldintluanga Tlau, Republic Vengthlang te tangdunin bronze medal dawngin, Women’s Doubles-ah Lalvenhimi, Thakthing leh Zothansangi, Saron Veng ten bronze medal an la bawk.

Team inelnaah Mizoram Junior Boy’s team leh Girl’s team te chuan bronze medal an dawng ve ve bawk a ni. 

Mizo player-te medal lak dan:

JUNIOR CATEGORY:
Boy’s Singles:
H. Lalthazuala - Gold
Saitluangpuia Sailo – Silver

Boy’s Doubles:
C. Lalramzauva & Lalnuntluanga - Gold

Girl’s Doubles:
Lalrempuii & Abigail Lalthazuali - Gold

Mixed Doubles:
C. Lalramzauva & Lalrempuii - Gold

Girl’s Singles:
Lalrinkimi - Silver
Abigail Lalthazuali - Bronze

SENIOR CATEGORY:
Mixed Doubles:
Laldingpuii & Joseph VL Ringngheta - Gold

Men’s Doubles:
Laldintluanga Tlau & Lalrinawma - Bronze

Women’s Singles:
Ramngaihzuali - Bronze

Women’s Double:
Zothansangi & Lalvenhimi - Bronze

TEAM CHAMPIONSHIP
Under 19 Boys Team - Bronze
Under 19 Girls Team – Bronze