Aizawl: Delhi leh a chhehvela hmarchhak mi zirlai leh hnathawk a awm, harsatna tawk te tan Police te an inhawng reng a, anmahni pan thin turin an duh niin Zalen thudawnna chuan a sawi. Hmarchhak mite enkawl tur bika ruat IGP Robin Hibu, IPS in Zalen a hrilh danin harsatna tawk te chu Police hnen pan vat tur emaw telephone no. 1093 te be vat turin a duh tih a sawi a. Hmarchhak mite chu Delhi khawpuia Timarpur, Janakpuri, Mahipalpur, Munirka, Safdarjung hmunah te an khawsa tam deuh nia a hriat thu sawiin mi tam tak chu inbualna leh inthiarna te an neih that tawkloh avangin fimkhur a ngai bik nia a hriat thu sawiin anmahni pawh hun remchang hmasa berah tlawhchhuah a tum niin Zalen a hrilh bawk. Robin Hibu chuan Delhi mai bakah India ram khawpui dangah te pawh harsatna tawk an awm anih chuan amah chu a rang lama hriattir tura a duh thu a sawi.        Myanmar a sipai sawrkar hlauh vangin Burma mi tam tak chu raltlanin Vikaspuri (Delhi) ah an khawsa tih sawiin Robin Hibu chuan heng mite an himnan leh tihduhdah an tawrh lohnan theihtawp a chhuah tih Zalen a hrilh bawk .